Aımaqtaǵy ınvestorlar qandaı problemaǵa tap bolýda

ASTANA. QazAqparat - QR Parlamentinde ınvestorlardyń birqatar júıelik problemasyn sheshýge baǵyttalǵan zań jobasy qaralýda. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

«Aımaqtaǵy ınvestorlardyń júıelik máselelerine toqtalǵym keledi: Birinshi, bul jer ýchaskelerin berý máselesi. Ár óńirde derlik, jerdi alýǵa kómek kórsetýdi qajet etetin ınvestıtsııalyq jobalar, bizdiń esebimizshe, mundaı 25 joba bar. Árbir joba boıynsha ákimdiktermen naqty jumys atqaryp jatyrmyz», - dedi ol.

Ekinshiden, mınıstrdiń aıtýynsha, birqatar jobalardy iske asyrý ınjenerlik ınfraqurylym máselesiniń uzaq merzimdi sheshilýine kedergi keltiredi.

«Bul másele júıelik sıpatqa ıe. Qazirgi kezde tıisti mehanızm ázirlenýde. Óńirlerde mundaı onshaqty joba bar», - dedi Jeńis Qasymbek.

Onyń aıtýynsha, úshinshi, quny 5,1 mlrd AQSh dollaryn quraıtyn 6 joba boıynsha gazben jabdyqtaý jáne gaz baǵasy máseleleri sheshilmegen.

«Gazdy shıkizat retinde paıdalanatyn jobalarǵa gaz baǵasynyń máselesin sheshý úshin, gaz jáne gazben jabdyqtaý salasyndaǵy zańnamany jáne zańǵa táýeldi aktilerdi ózgertý qajet. Qazirgi ýaqytta Energetıka mınıstrligimen tıisti zań jobasynyń Tujyrymdamasy ázirlendi»,-  dedi ol.

Mınıstr deregenshe, tórtinshiden, arnaıy ekonomıkalyq aımaqtardyń qyzmetine qatysty ınfraqurylymnyń aıaqtalmaýy  jobalarmen toltyrý, basqarýshy kompanııalardyń tıimdiligi syndy birqatar másele bar.

«Qazirgi ýaqytta Parlamentte birneshe negizgi mindetterdi sheshýge baǵyttalǵan zań jobasy bar. Olar: salyq jeńildikteri mehanızmin jetildirý; Arnaıy ekonomıkalyq aımaq pen Indýstrııalyq aımaqty basqarýshy kompanııalardyń bedeli men mártebesin nyǵaıtý; Arnaıy ekonomıkalyq aımaq pen Indýstrııalyq aımaq qatysýshylaryna basqarýshy kompanııalardyń jer ýchaskelerin berýdiń jańa mehanızmin engizý; ındýstrııalyq aımaqtardy retteý»,- dedi Jeńis Qasymbek.