Aımaqtaǵy 22 HQO-da júrgizýshi kýáligin aýystyrýǵa bolady

ASTANA. QazAqparat - Elimizdiń 11 oblysy boıynsha 19 aýdandyq jáne 3 qalalyq halyqqa qyzmet kórsetý ortalyǵy arqyly aımaq turǵyndary júrgizýshi kýáligin aýystyra alady. Bul týraly «Azamattarǵa arnalǵan úkimet» korporatsııasynyń baspasóz qyzmetine silteme jasap, QazAqparat habarlaıdy.

HQO-da kólik tirkeıtin jáne júrgizýshi kýáligin aýystyrý jumystarymen aınalysatyn aýdandyq ákimshilik polıtsııanyń tirkeý-emtıhan alý bóliminiń mamandary qyzmet kórsetedi. 2018 jyly atalǵan aýdandyq HQO-lar arqyly 12 myńdaı kólik júrgizýshi kýáligi berilgen.

Bul sektorlar arqyly azamattar merzimi bitýge taıaý júrgizýshi kýáligin jańasyna almastyra alady, bul rette tıisti emtıhandardy tapsyryp, medıtsınalyq tekseristen ótýdiń qajeti joq. Aımaq turǵyndary kólik júrgizý qujatyn joǵaltqan jaǵdaıda atalǵan HQO-larda ýaqytsha qujat ala alady. Onyń jaramdylyq merzimi - 1 aı, keıin «joǵalǵannyń ornyna» belgisimen jańa kólik júrgizý kýáligi beriledi.

Bul rette kólik júrgizý quqyǵynan aıyrylǵan tulǵalar júrgizýshi qujatyn qalpyna keltirý úshin tıisti emtıhandardy tapsyrý kerektigin eske salamyz.

«Sondaı-aq, astanalyq kólik ıeleriniń nazaryna júrgizýshi kýáligin mamandandyrylǵan HQO-dan bólek Táýelsizdik dańǵyly, 32 mekenjaıyndaǵy HQO-da almastyrýǵa bolatynyn habarlaımyz. Budan bólek, kólikti tirkeý jáne júrgizýshi kýáligin onlaın aýystyrý qyzmetiniń elektrondyq úkimet portaly arqyly júzege asyrýǵa bolatynyn eske salamyz. Ol úshin kólik júrgizýshiniń elektrondyq tsıfrlyq qoltańbasy bolýy shart» delingen habarlamada.

Portal arqyly ótinishpen qosa fotosýret jáne qoıǵan qolynyń skan-sýreti de joldanyp, baj salyǵy tólenedi. Jeke kabınetke qujattyń daıyn bolǵandyǵy týraly habarlama kelgen soń, (mobıldi azamattar bazasyna tirkelgen jaǵdaıda habarlama SMS túrinde keledi) mamandandyrylǵan HQO-ǵa baryp, daıyn júrgizýshi kýáligin alyp ketýge bolady.

Júrgizýshi kýáligin aýystyrýǵa bolatyn aýdandyq HQO mekenjaılary

Oblys ataýy	Aýdan ataýy
Almaty oblysy	Eńbekshiqazaq aýdany
Aqmola oblysy	Esil aýdany
	Aqkól aýdany
	Stepnogorsk qalasy
Jambyl oblysy	Sarysý aýdany
	Talas aýdany
ShQO	Jarma aýdany
BQO	Qaztalov aýdany
	Bórili aýdany
Qaraǵandy oblysy	Qarqaraly aýdany
	Osakarov aýdany

Oblys ataýy	Aýdan ataýy
Qyzylorda oblysy	Qazaly aýdany
	Jalaǵash aýdany
	Aral aýdany
	Jańaqorǵan aýdany
	Qarmaqshy aýdany
	Shıeli aýdany
Pavlodar oblysy	Aqsý qalasy
SQO	Taıynshy aýdany
Mańǵystaý oblysy	Beıneý aýdany
Túrkistan oblysy	Túrkistan qalasy
	Saıram aýdany