Aımaǵambetov muǵalimderge alǵys aıtty
Ashat Qanatuly áleýmettik jelidegi paraqshasyna aldymen 2019 jylǵy maýsym aıynda Prezıdent Qasym-Jomart Toqaev ózine óte mańyzdy bilim men ǵylym salalaryn senip tapsyrǵanyn jazǵan.
«Keıinnen Memleket basshysy meni úsh ret qaıta taǵaıyndady. Aldymen Bilim jáne ǵylym mınıstri, sodan keıin 100 jylǵa jýyq ýaqyttan keıin qaıta qurylǵan, ulaǵatty aǵartýshy, ult ustazy Ahmet Baıtursynov basqarǵan Oqý-aǵartý mınıstrligine qaıta taǵaıyndady.
Osy ýaqyt ishinde maǵan júktelgen senimdi aqtaýǵa jáne ashyq bolýǵa, jumysta tıimdi ári paıdaly bolýǵa tyrystym.
Ómirimniń osy mańyzdy kezeńinde sizderdiń, Prezıdenttiń, muǵalimderdiń, ata-analardyń, mınıstrliktiń búkil ujymynyń, azamattyq qoǵamnyń qoldaýynyń arqasynda mańyzdy nátıjelerge qol jetkizdik.
Bilim jáne ǵylym salasyna jaýapty bolǵan mınıstr retinde ózderińizge esep berip, atqarylǵan jumystar týraly aıtý jón dep sanaımyn. Aldaǵy ýaqytta mınıstr laýazymynda qabyldanǵan árbir sheshim týraly egjeı-tegjeıli esep berýdi jáne bul sheshimderdiń logıkasy týraly aıtýdy josparlap otyrmyn. Ony kez kelgen adam kóre alady.
Osy jyldar ishinde men halqymyzdyń batasyn alyp, Prezıdenttiń senimin aqtaý úshin, el ıgiligi úshin jumys isteýge tyrystym.
Jalpy alǵanda, men úshin ýaqyt talabyna sáıkes keletin jańa reformalardy engizý ǵana emes, sonymen qatar sabaqtastyqty saqtaý mańyzdy boldy. Ásirese, pandemııa kezinde qıyn boldy, biraq áriptesterimizdiń túsinigi men qoldaýynyń arqasynda ol ýaqyttan da óttik.
Osy ýaqyt aralyǵynda muǵalimderdiń úlken qoldaýyn sezindim. Sol úshin qurmetti áriptesterime alǵys aıtqym keledi. Meniń sheshimderimdi túsinip, qoldaǵandaryńyz úshin raqmet. Onyń barlyǵy árqaısyńyzdyń eńbek jaǵdaıyńyzdy jaqsartýǵa baǵyttalǵan bolatyn.
Prezıdenttiń qoldaýy arqasynda biz óte mańyzdy qujatty - «Pedagog mártebesi týraly» zańdy qabyldadyq.
Sonyń arqasynda túbegeıli ózgerister boldy, mysaly, jalaqyny kóterý, qosymsha tólemder, mindetke jatpaıtyn qyzmetterden bosatý, bes kúndik jumys aptasyna aýysý, 30 jyl eńbek ótili bar muǵalimderdi UBT-dan bosatý jáne 25 jyldan astam jumys ótili bar muǵalimderge tósbelgi taǵaıyndaý jáne t.b.
Bilim berý salasy - qarqyndy damyp kele jatqan sala. Sondyqtan engizilgen jańalyqtarǵa túsinistikpen qaraǵan ata-analarǵa alǵysymdy bildirgim keledi. Qandaı da bir bastamany júzege asyrǵanda balalarymyzdyń múddelerin negizge aldyq. Osyǵan deıin de balalarymnyń memlekettik mektep pen balabaqshaǵa baratynyn birneshe ret aıtqan bolatynmyn.
Biz balabaqsha tárbıeshilerine, kolledj muǵalimderi men ýnıversıtet oqytýshylaryna da qolaıly jaǵdaı jasaýǵa tyrystyq.
Barlyq ıdeıa men alǵa qoıylǵan mindetti iske asyrǵan Oqý-aǵartý mınıstrliginiń, vedomstvolyq baǵynysty uıymdardyń, departamentterdiń, bilim basqarmalarynyń, ádistemelik kabınetterdiń, bilim berý uıymdarynyń barlyq qyzmetkerine erekshe alǵysymdy bildirgim keledi.
Sizder baǵalaýǵa kelmeıtin aýqymdy jumys atqardyńyzdar. Keıde tym qatal, talapshyl bolatynymdy bilemin.
Ashyq sóılep, qoldaý bildirip, syn aıtqan qoǵam qaıratkerleri men belsendilerge alǵys aıtamyn. Men árqashan syndarly eskertýlerdi qabyldaýǵa daıynmyn jáne olardy túzetýge tyrysamyn.
Sondaı-aq jańalyqtarymyzdy jarııalaǵan jýrnalısterge de eńbekteri úshin alǵys aıtamyn. Biz ózekti aqparatty belsendi túrde bólisýge jáne dıalog úshin árqashan ashyq bolýǵa tyrystyq.
Kez kelgen adam tyńdaı alatyn apparat jınalystary apta saıyn uıymdastyryldy. Jumys kestemniń tyǵyzdyǵyna qaramastan, suhbatqa da ýaqyt bólýge tyrystym. Óıtkeni jańalyqtar men qabyldanǵan sheshimderdi otandastarymyzǵa ýaqytyly jetkizý jáne olardyń túsinýi mańyzdy boldy.
Tárbıeshilermen, oqýshylarmen, stýdenttermen, ustazdarmen, mektep, kolledj dırektorlarymen, oqytýshylarmen, rektorlarmen, ǵalymdarmen, bilim basqarmalary men vedomstvolyq baǵynysty uıymdardyń basshylarymen kóptegen kezdesý ótkizdim. Men úshin ártúrli deńgeıdegi bilim berý ókilderiniń pikirlerin tyńdaý jáne qandaı da bir sheshim qabyldaǵanda barlyq máseleniń «oń» jáne «teris» jaqtaryn tarazylaý mańyzdy boldy.
Osy qyzmette salanyń damýyna úles qosyp, otandastarym men Prezıdenttiń senimin aqtaı aldym dep úmittenemin», - delingen mınıstrdiń jazbasynda.