Aımaǵambetov mektep dırektorlaryna: Muǵalimderdi sabaqtan tys jumystarǵa tartpańyzdar

TARAZ. QazAqparat – QR Bilim jáne ǵylym mınıstri Ashat Aımaǵambetov Taraz qalasyna jumys saparymen kelip, Jambyl oblysynyń ákimi Berdibek Saparbaevpen birge mektep dırektorlarymen kezdesti, dep habarlaıdy QazAqparat tilshisi.

Kezdesý M.H.Dýlatı atyndaǵy Taraz óńirlik ýnıversıteti bas ǵımaratynyń májilis zalynda ótti.

Basqosýdy ashqan oblys ákimi jyl saıyn oblysta jańa mektepter salynyp, tozyǵy jetkenderi kúrdeli jóndeýden ótip jatqandyǵyn atap ótti. Jańa oqý jylynyń dástúrli formatta bastalý múmkindigin eskere otyryp, Prezıdent tapsyrmasyna sáıkes mektepterdiń balalardy qabyldaýǵa daıyndyǵy pysyqtalýda.

«Memleket basshysy Qasym-Jomart Toqaevtyń tapsyrmasyna sáıkes bilim salasynda qolǵa alynǵan reformalar óz jalǵasyn tabatyn bolady. Bul baǵytta Jambyl oblysynda da aýqymdy jumystar júrgizilýde. PISA (matematıkalyq saýattylyq deńgeıin baǵalaý), TIMSS (matematıkalyq jáne jaratylystaný ǵylymdarynyń sapasyn zertteý) halyqaralyq zertteýleriniń taldaýy oblystyń joǵary kórsetkishterge qol jetkizgenin kórsetip otyr», - dedi Ashat Aımaǵambetov.

Ol óz sózinde bilim berý uıymdaryndaǵy balalardyń qaýipsizdigin qamtamasyz etý máselelerine nazar aýdartty.

«Oblystyń barlyq mektepterinde baqylaý kameralary ornatylyp, jyly sanıtarlyq toraptarmen qamtylǵan. Mektepter kezeń-kezeńimen avarııalyq dabyl túımelerimen, týrnıkettermen jabdyqtalady, kameralar oblystyq Polıtsııa departamentiniń Jedel basqarý ortalyǵymen ıntegratsııalanatyn bolady. Ár balanyń derekteri engizilgen áleýmettik kartalar ashylýda», - dedi oblys ákimi.

Ashat Aımaǵambetov mınıstrlik júzege asyrǵan birneshe jobalarmen tanystyryp, muǵalimder men mektep dırektorlaryn irikteýdiń jańa erejeleri qabyldanatyndyǵyn jetkizdi.

Mınıstr mektep dırektorlarynan bilim berý mekemelerindegi bıýrokratııany joıýdy talap etti. Mınıstrlikpen bilim berý uıymdarynyń pedagogtarynyń júrgizýi mindetti qujattardyń naqty tizbesin bekitipti.

«Buıryqqa sáıkes kún saıyn tek eki qujat toltyrylýy tıis. Sol eki qujat boıynsha jumys isteý mańyzdy jáne muǵalimderdiń jumysyn qoldan qıyndatpaý kerek. Olardyń basty mindeti – sabaq ótkizip, balalarǵa bilim berýmen aınalysý. Muǵalimderdi sabaqtan tys jumystarǵa tartpańyzdar», - dedi ol.

Óz sózinde Berdibek Saparbaev ta mektep dırektorlaryna tárbıe úderisine erekshe nazar aýdarý qajettigin atap ótti.

Kezdesýge qatysýshylar da óz usynystary men suraqtaryn ortaǵa saldy.