Aımaǵambetov kolledjge tapsyrýshylardyń azdyǵyn túsindirý jumystarynyń kemshiligi dep sanaıdy

NUR-SULTAN. QazAqparat – Kolledjderge talapkerlerdi tartý jumysy jetkiliksiz júrgizilip jatyr. Bul týraly Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Aqparattyq jumys jetkiliksiz júrgizilip jatyr. Bıyl 45 myńnan astam qosymsha grant bólindi. Bul degenimiz, 45 myńnan astam bala tegin kolledjde bilim alý múmkindigine ıe boldy degen sóz. Biraq, endi osy aqparatty barlyq mektep bitirýshilerge jáne 9 synyp bitirýshilerine jetkizýmiz kerek. Olarmen tıisti jumys júrgizý qajet. Árıne, sizder olarǵa barmaı qol qýsyryp otyra berseńizder, onda eshkim bul aqparatty bilmeıdi, kolledjge kelmeıdi. Sondyqtan bul jumys qazirgi ýaqytta jetkiliksiz. Osy jumysty bilim basqarmalary, kolledjder áleýmettik jelide taratý arqyly jandandyrsyn», - dedi Ashat Aımaǵambetov mınıstrliktiń apparat jınalysynda.

Mınıstrdiń atap ótýinshe, birneshe óńirde kolledjderge memlekettik tapsyrys kólemi tómendegen.

«Bul máseleni qaıta qarastyrýdy tapsyramyn. Tómendeý bolmaýy kerek. Bul Prezıdenttiń tapsyrmasy bolǵan. Qosymsha respýblıkalyq bıýdjetten grant berip jatyrmyz. Biraq, bul jergilik jerlerdiń máselesi edi. Balalar jyly bolǵannan keıin respýblıkalyq bıýdjetten qarajat bólip jatqanda jergilikti jerde grant sanyn azaıtý qısynsyz. Oǵan jol berýge bolmaıdy», - dedi ol.