Aımaǵambetov: Dırektorda úsh orynbasar, eki esepshi bola ma báribir – bizge keregi bilim sapasy

NUR-SULTAN. QazAqparat – Bilim jáne ǵylym mınıstri Ashat Aımaǵambetov bilim berý uıymdaryndaǵy tıptik shtattar aldaǵy ýaqytta mindetti bolmaıtynyn málim etti, dep habarlaıdy QazAqparat tilshisi.

«Bilim berý uıymdarynda tıptik shtattar mindetti bolmaýy tıis. Óıtkeni jan basyna shaqqandaǵy qarjylandyrý degen – bir balaǵa shaqqanda qarjy berip, mektep basshylyǵy men qamqorlyq keńesiniń qolyn bosatýymyz kerek. Óıtkeni mektep basshysy eki nemese úsh orynbasary, eki esepshisi bola ma – ózi sheshýi kerek. Biz ony qalaı bolsa da úsh orynbasar bolýy kerek dep mindettemeýge tıispiz. Eger únemdegisi kelse – óz erki. Bir orynbasary bolsa da báribir. Bizge keregi – bilim sapasy», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.

Mınıstr jaýapty qyzmetkerlerge osy máseleni qysqa merzimniń ishinde sheshýdi tapsyrdy.

Eske sala ketsek, buǵan deıin Ashat Aımaǵambetov jan basyna qarjylandyrý júıesimen jumys júrgizbegen bilim basqarmalarynyń basshylaryn synǵa alǵan edi.