Aılyq tabysy 50 myń teńgege jetpeıtinder úlesi 50 paıyzdan azaıdy - Ulttyq statıstıka bıýrosy

NUR-SULTAN. QazAqparat – Jan basyna shaqqandaǵy ortasha aılyq tabysy 50 myń teńgege jetpeıtin qazaqstandyqtardyń úlesi 38,7% bolyp otyr. Ulttyq statıstıka bıýrosy QazAqapart saýalyna osyndaı jaýap berdi.

«Memleket basshysy jarııa etken «halyqtyń jartysynyń aılyq tabysy 50 myń teńgeden aspaıdy» degen aqparat COVID-19 pandemııasynyń eń joǵary kezeńi retinde belgilengen 2020 jylǵy derekterge jatady. 2020 jyly jan basyna shaqqandaǵy ortasha tabys 50 myń teńgege deıin halyqtyń 45,5%-ynda tirkelgen», - dep jazady bıýro mamandary.

Vedomstvonyń málimetine súıensek, Ulttyq statıstıka bıýrosy 12 myń úı sharýashylyǵynyń turmys deńgeıine iriktemeli zertteý júrgizip, sonyń qorytyndysy negizinde halyqtyń tabysy týraly aqparat qalyptastyrǵan.

«Halyqtyń tabysy boıynsha derekter jan basyna shaǵyp esepteledi. Oǵan eńbek qyzmetinen túsken tabys (jalaqy jáne kásipkerlik qyzmetten túsken tabys), áleýmettik transfertter jáne ózge de aqshalaı túsimder kiredi. Úı sharýashylyǵynyń jalpy tabysynyń somasy onyń barlyq múshelerine, onyń ishinde balalarǵa, zeınetkerlerge, jumyssyzdarǵa jáne basqalarǵa bólinetindigin túsindiremiz. «Halyqtyń jan basyna shaqqandaǵy ortasha tabysy» uǵymy «jalaqy» uǵymynan túbegeıli erekshelenetinine nazar aýdaramyz. Jalaqy tabystyń bir bóligi bolyp tabylady», - dep jazylǵan jaýapta.

Resmı statıstıka boıynsha, Prezıdent Qasym-Jomart Toqaev ataǵan kórsetkish 2021 jyly oń baǵytqa ózgergen.

«2021 jyldyń qorytyndysy boıynsha jan basyna shaqqandaǵy ortasha tabys boıynsha oń dınamıka baıqalady. Jan basyna shaqqandaǵy ortasha tabysy 50 myń teńgege deıingi halyqtyń úlesi halyqtyń 38,7%-ynda tirkelgen.

Jan basyna shaqqandaǵy ortasha tabystyń halyqtyń kedeılik deńgeıiniń kórsetkishterin esepteýden aıyrmashylyǵy – ekvıvalenttik shkalasynsyz qalyptasady.

Qalalyq/aýyldyq jerler men óńirler boıynsha halyqtyń jan basyna shaqqandaǵy ortasha tabysyn bólý boıynsha derekterdi qalyptastyrý júrgizilmeıdi. Óıtkeni, derekterdiń reprezentatıvtiligi qamtamasyz etilmeıdi. Sonymen qatar, mundaı derekter tek analıtıkalyq maqsattar úshin qurylýy múmkin. Bul kem degende bir aı merzimge qosymsha esepteýlerdi qajet etedi», - dep jazylǵan redaktsııa saýalyna joldanǵan jaýapta.

Buǵan deıin Ulttyq statıstıka bıýrosy halyqtyń statıstıkalyq saýatyn arttyrý úshin «Data literacy» jobasyn qolǵa alatyny habarlandy. Statıstıkalyq saýattylyq kýrsyn memqyzmetshilerge mindetteý usynylady.