«Aıqaı» fılmi Ispanııadaǵy halyqaralyq festıvalde top jardy

<p>ASTANA. KAZINFORM - &laquo;Aıqaı&raquo; Ispanııadaǵy ImagineIndia International Film Festival kınofestıvalinde top jardy. Fılm 70-ke jýyq týyndynyń ishinen tańdalyp, &laquo;Úzdik stsenarıı&raquo; atalymyna qol jetkizdi.</p>

Fılm Mádenıet jáne aqparat mınıstrligi, Ulttyq kıno ortalyǵynyń qoldaýymen túsirilgen. Týyndyda ıadrolyq jarylystan zardap shekken Semeı polıgony qurbandarynyń taǵdyry baıandalady. Mańyzdy máseleni qaýzaǵan fılmniń 23-shi ret ótkizilip otyrǵan festıvalde top jarýy beker emes.

Fılmniń rejısseri – Kenjebek Shaıqaqov. «Aıqaı» – rejısserdiń ekinshi tolyqmetrajdy jumysy. Kórkem fılmniń túsirilimi Abaı oblysy Aıagóz aýdany Shyńǵoja aýylynda ótti. Basty rólderderde Orynbek Shaımaǵanbetov, Arnur Akram, Erbolat Álqoja, Beınur Baımuhambetov, Erlan Malaev, Aıbek Imanqulov jáne Aıǵanym Nursultan oınaıdy.

ImagineIndia festıvali – Úndi sýbkontınenti, Azııa elderi, Ispanııa jáne onymen birge Eýropalyq Odaq arasyndaǵy dostyq pen yntymaqtastyqty damytýǵa arnalǵan aýqymdy joba. «Aıqaı» fılminiń jetistigi mádenı yntymaqtastyqtyń, áleýmettik jáne ekologııalyq máselelerge qatysty oqıǵalardy nasıhattaýdyń mańyzdylyǵyn kórsetedi.