«Aıka» fılminiń Oskarǵa talasatyn múmkindigi bar - vıtse-mınıstr

ASTANA. QazAqparat - Kann kınofestıvalinde júlde alǵan «Aıka» fılminiń Qazaqstan atynan Oskarǵa qatysatyn múmkindigi bar. Bul týraly QR Mádenıet jáne sport vıtse-mınıstri Aqtoty Raıymqulova málimdedi, dep habarlaıdy QazAqparat tilshisi. 

Búgin QR Mádenıet jəne sport mınıstri Arystanbek Muhamedıuly Qazaqstan tarapynan Oskar syılyǵyna usynylǵan «Aıka» fılminiń ótpeı qalǵanyn aıtqan edi. Mınıstrdiń atap ótýinshe, kórkem fılm rejıseri Sergeı Dvortsevoı Qazaqstanda týyp ósken, alaıda keıin Reseı azamattyǵyn alǵan.

«Bul máseleni baqylaýda ustap otyrmyz. Árıne, ár baıqaýdyń ózindik talaptary bar. Biraq, biz qazir kınotúsirilim tobynda qazaqstandyqtar jumys istegenin, ekinshi planda oınaǵanyn dáleldep jatyrmyz. Bul - amerıkalyq taraptyń resmı habary emes. Sondyqtan, Oskar úmitkerleriniń qataryna qosylatyn múmkindigimiz kóp. Amerıkalyq taraptan jaýap kútýdemiz», - dedi A. Raıymqulova Ortalyq kommýnıkatsııalar qyzmetinde ótken brıfıngte. 

Vıtse-mınıstrge «Aıka» ótpegen jaǵdaıda, Oskarǵa qandaı qazaqstandyq fılm usynylady?» degen suraq qoıyldy. 

«Bul óte bedeldi syılyq jáne onyń birqatar talaptary bar. Emır Baıǵazın laıyqty úmitker bolar edi, biraq ýaqyt talabyna baılanysty, onyń fılmin kelesi jyly ǵana usyna alamyz. ıAǵnı, «Aıka» - ýaqyty, mártebesi jaǵynan eń qolaıly ónim bolyp otyr. Onyń Kann kınofesıvaliniń jeńimpazy degen ataǵy bar jáne shyn máninde nasıhattalýy tıis sapaly fılm. Qazaqstan úshin «Aıka» fılmin Oskarǵa usyný - úlken mártebe bolar edi», - dep jaýap berdi vıtse-mınıstr.