Aıgúl Múkeı jańa telebaǵdarlamasynda óńirlerdi aralaıdy

ASTANA. QazAqparat – Qazaqstannyń tanymal telejýrnalısteri Aıgúl Múkeı men Sándi Sultan Jibek joly arnasynda «Túngi stýdııa» baǵdarlamasynda otandyq jýrnalıstıkadaǵy jańa ózgerister týraly pikir bildirdi, dep habarlaıdy QazAqparat.

Aıta keteıik, 28 maýsym – elimizde buqaralyq aqparat quraldary qyzmetkerleriniń, sonymen birge baılanys salasy mamandarynyń kásibı merekesi.

Óz sózinde Aıgúl Múkeı jýrnalıstıka salasyna 30 jyl buryn kelgenin jáne sol kezdegi televızııa men qazirgi sala arasynda aıyrmashylyq úlken ekenin jetkizdi.

«Basymnan ótken qyzyq oqıǵa esime túsip otyr. Shamamen 2004-2005 jyldary jyly keshki jańalyqtardy 4-5 adam júrgizdik. Negizgi jańalyqtardy men oqımyn, sheteldik habardy – taǵy bir dıktor, odan keıin – sport, odan keıin – aýa raıy bolyp jalǵasyp kete beretin. Kezekti bir efır aldynda áriptesterime anekdot aıtyp bergen edim. Stýdııada qyran-topan kúlki, tikeleı efır bastalǵaly jatsa da, kúlkilerin tyıa almady. Jalǵyz ózim ǵana baısaldy keıipte boldym, sol kúni basshylyqtan eskertý aldym. Qazir jańalyqtar formaty ózgerissiz qaldy, biraq basqa baǵdarlamalar túbegeıli ózgerdi. «Túngi stýdııa» sekildi baǵdarlamalar naǵyz klassıkaǵa aınalyp ketti, degenmen urys-keris, daý-damaıǵa toly tok-shoýlar da kóbeıip ketti», - dedi ol.

Sonymen birge, Aıgúl Múkeı Jibek joly telearnasyndaǵy jańa jobasy týraly aıtyp berdi.

«Osy maýsymda «Bez prıkras» atty avtorlyq jobam júrip jatyr. Biraq kelesi maýsymda onyń formatyn ózgertemiz. Jańa maýsymda bul baǵdarlama basqasha bop shyǵady. Úlken avtobýspen óńirlerge shyǵamyz, el aralaımyz, adamdardyń obrazyn ózgertemiz. Soǵan qyzý daıyndyq júrip jatyr», - dedi jýrnalıst.

Al Sándi Sultannyń aıtýynsha, qazirgi televızııa barynsha erkin, burynǵydaı standarttar men qatań talaptar qoıylmaıdy.

«Qazir túrli daýys bar, basty nazar aqylyńa, bilim kókjıegińe qoıylady, sulý bolý mindetti emes, tartymdy bolsań jetkilikti. Men jýrnalıst bolǵysy keletin jastarǵa sabaq beremin, sondaǵy jýrnalıst bolýdy armandaıtyn jastardyń ózderi teledıdar kórmeıdi. Súıikti telejúrgizýshileriń kim dep surasam, jaýap bere almaıdy. Internetke kóshtik dese de, sol ınternette de televızııalyq ónimdi tutynyp otyrmyz. Televızııa mamandary sapaly ónimderin Youtube jelisine júkteıdi», - deıdi S. Sultan.

Tájirıbeli jýrnalıster tikeleı efırdi kóbeıtýge keńes berdi. Shoý men serıaldan basqanyń bári tikeleı efırde kórsetilýi keregin, tilshiler ouıǵa ornynan eń ózekti kórinisti jetkize alýy qajettigin aıtty.