Áıgili opera ánshisi, «Gremmı» ıegeri Sýmı Cho astanada óner kórsetedi
Erteń elordadaǵy «Astana Opera» teatrynda H mereıtoılyq maýsym bastalady.
Atalǵan óner oshaǵy ókilderiniń aıtýynsha, jańa maýsymnyń ashylýynda opera ártisteri qazaq, koreı jáne batys eýropalyq shyǵarmalardy oryndaıdy. Olardyń qatarynda A.Jubanov pen L.Hamıdıdiń «Abaı» operasynan kópshiliktiń súıip tyńdaıtyn «Toıbastar» sahnalyq kórinisi, J.Offenbahtyń «Gofman ertegileri» operasynan Olımpııa shýmaqtary, F.Legardyń «Kúlki eli» operettasynan hanzada Sý Hongtyń arııasy, «Pýrıtandyqdar» operasynan Rıkardonyń arııasy jáne taǵy basqa kóptegen tanymal týyndylar bar.
«Osydan 10 jyl buryn alǵash ret Almatyda boldym. Qysqy Azııa oıyndarynyń ashylýyna qatystym. Ekinshi ret kelgenimde elordada boldym. Mine, buıyryp Qazaqstanǵa úshinshi ret kelip otyrmyn. Bıyl Koreıa men Qazaqstan arasyndaǵy dıplomatııalyq qarym-qatynastyń ornaǵanyna 30 jyl tolyp otyr. Osy oraıda Qazaqstanda taǵy óner kórsetýdiń sáti túskenine qýanyshtymyn. Tek ártis emes beıbitshilik pen dostyqty qoldaıtyn adam retinde de», - dedi áıgili opera ártisi Sýmı Cho «Astana Opera» teatrynda ótken baspasóz máslıhatynda.
Sondaı-aq ártis qazaqstandyq opera ánshileriniń ónerin joǵary baǵalaıtynyn aıtty.
«Men álem elderin aralap óner kórsetip kelemin. Qazaqstan men onyń mádenıetine degen qyzyǵýshylyǵym joǵary. Qazaq ánderin oryndaǵym keledi. Dımash Qudaıbergenmen jaqsy aralasyp turamyz. Osy joly Nur-Sultan qalasyna kele jatqanda ushaqta Dımashtyń ónerin tamashalap keldim», - deıdi ol.
Erteń Sýmı Cho «Astana Opera» teatry sahnasynda qazaqstandyq Azamat Jyltyrkózov, Medet Shotabaev, Tatıana Vıtsınskaıa jáne taǵy basqa opera ártisterimen birge óner kórsetedi.
Aıtýly óner keshiniń hor jáne orkestr dırıjeri – qazaqstandyq maestro Alan Bóribaev.
«Biz úshin álemge áıgili Sýmı Cho hanymmen bir sahnada óner kórsetý baqyt. Erteń ol kisi oryndaıtyn ár shyǵarmanyń orny bólek ári erekshe. Álemdik deńgeıdegi opera ártisiniń qazaqstandyq kórermender úshin óner kórsetetine qýanyshtymyz», - deıdi ol.