Áıeline judyryq jumsady: Rahat Turlyhanov 10 táýlikke qamaýǵa alyndy

<p>ALMATY. KAZINFORM - Rahat Turlyhanovqa qatysty ákimshilik is appelıatsııalyq sotta qaıta qaraldy. Aıyptalýshynyń jazasy - eskertýden, 10 táýlikke ákimshilik qamaqqa alýǵa ózgertildi.</p>

Buǵan deıin ákimshilik quqyq buzýshylyq isteri jónindegi mamandandyrylǵan aýdanaralyq soty R.Turlyhanovqa qatysty ákimshilik eskertý týraly qaýly shyǵarǵan.

Atalǵan materıaldy qaraý barysynda, sot alqasy buryn jubaıyn birneshe ret uryp-soǵý faktilerin eskerip, birinshi satyly sottyń taǵaıyndaǵan jazasymen kelispedi.

Almaty qalalyq sotynyń alqasy, mamandandyrylǵan aýdanaralyq ákimshilik sotynyń qaýlysyn ózgerti.

«Sot alqasynyń qaýlysymen R.Turlyhanovqa qatysty jaza - eskertýden, 10 táýlikke ákimshilik qamaqqa alýǵa ózgertildi»,- dep habarlady qalalyq sottyń baspasóz qyzmeti.

Qaýly zańdy kúshine endi.

Aıyptalýshy men jábirlenýshi sýdıadan sot otyrysyna qatysýǵa kelgen buqaralyq aqparat quraldarynyń ókilderin shyǵaryp jiberýdi suraǵan bolatyn.

Eske salaıyq, ótken jyldyń jeltoqsan aıynda Rahat Turlyhanov úıinde janjal shyǵaryp, áıelin soqqyǵa jyqqan. Sot otyrysynda ol óz kinásin moıyndap, istegen isine ókinetinin jetkizdi. Sondaı-aq, tatýlasqandaryn aıtyp, sottan isti toqtatýdy suraǵan edi.

Keıin Rahat Turlyhanov pen onyń áıeli vıdeojazba jarııalady.