Áıelin óltirip, máıitin qudyqqa tastaǵan: Qostanaıda er adam sottaldy

QOSTANAI. QazAqparat - Qostanaıda otbasylyq janjal kezinde áıelin óltirgen er adamǵa úkim shyqty, dep habarlaıdy QazAqparat Qostanaı oblystyq sotynyń baspasóz qyzmetine silteme jasap.

Qostanaı oblysynyń qylmystyq ister jónindegi mamandandyrylǵan aýdanaralyq sotynyń úkimimen jubaıyn óltirgeni úshin Qostanaı oblysy Áýlıekól aýdanynyń turǵyny M. sottaldy.

«2021 jylǵy 6 naýryzda M. Áýlıekól aýdany Lavrentevka kentinde bolǵan janjal barysynda ol áıelin basyna taqqan oramalymen qylqyndyryp óltirgen. Qylmystyń izin jasyrý jáne qylmystyq jaýapkershilikten qutylý maqsatynda M. áıeliniń máıitin eski qudyqqa laqtyrǵan» dep habarlady oblystyq sot.

M. kinási onyń moıyndaýymen, sondaı-aq qylmystyq is materıaldarymen, onyń ishinde sot saraptamasynyń qorytyndysymen dáleldendi.

«M-nyń birinshi ret sottalyp otyrǵanyn, kinásin moıyndaǵanyn, jasaǵan isine shyn júrekten ókinetinin, kináni aýyrlatatyn mán-jaılardyń joǵyn eskere otyryp, sot oǵan eń joǵary qaýipsizdik qylmystyq-atqarý júıesi mekemesinde 10 jyl bas bostandyǵynan aıyrý jazasyn taǵaıyndady. Jábirlenýshi tarapqa moraldyq zııandy óteý esebinen 5 mln teńge jáne 500 myń teńge ókildik shyǵystar óndirip alyndy», - dep qorytyndylady sotta.

Úkim zańdy kúshine engen joq.