Áıelderge qaraǵanda er adamdar qaterli isikten jıi qaıtys bolady – DSM

<p>Qazaqstanda sońǵy 20 jylda qaterli isikpen syrqattaný deńgeıi 25 paıyzǵa artty. Bul týraly Ortalyq kommýnıkatsııalar qyzmetinde ótken brıfıngide Densaýlyq saqtaý vıtse-mınıstri Vıacheslav Dýdnık málim etti, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Erte me, kesh pe planetanyń árbir 5-shi turǵyny qaterli isikke shaldyǵady. Árbir 8-shi er adam jáne árbir 11-shi áıel osy aýrýdan qaıtys bolady. Mundaı sandardy Dúnıejúzilik densaýlyq saqtaý uıymy keltirip otyr. Ólim boıynsha qaterli isik júrek-qan tamyrlary aýrýlarynan keıin ekinshi orynda tur. Búkil álemde qaterli isik aýrýy turaqty túrde ósýde. Qazaqstanda sońǵy 20 jylda onkopatologııamen syrqattanýshylyq 25%- ǵa artty», - dedi Vıacheslav Dýdnık.

Onyń aıtýynsha, jyl saıyn qaterli isiktiń 30 myńǵa jýyq jańa jaǵdaıy anyqtalady. Búginde onkologııaǵa shaldyqqan 217 myńnan astam patsıent dınamıkalyq baqylaýda tur. Naýqastardyń 56 paıyzy – 18 ben 63 jas aralyǵyndaǵy eńbekke qabiletti adamdar. Vıacheslav Dýdnık atap ótkendeı, qaterli isikpen er adamdarǵa qaraǵanda áıelder jıi aýyrady.

«Taralýy boıynsha birinshi orynda – sút bezi obyry, ekinshi orynda – ókpe obyry, úshinshi orynda ishek obyry tur. Jyl saıyn 5 myń áıelge sút bezi qaterli isiginiń dıagnozy qoıylady. Elimizde jyl saıyn 13 myńnan astam adam qaterli isikten qaıtys bolady. Ásirese, qaterli isikten er adamdar jıi óledi», - dep derekter keltirdi vıtse-mınıstr.

Vıacheslav Dýdnık keltirgen derekke saı, elimizde 2 myńnan astam tekserý kabıneti bar jáne olarda 500-den astam onkolog-dáriger jumys isteıdi.