Áıelderdi tehnıkalyq mamandyqtarǵa oqytýdyń mańyzy zor - G.Ábdiqalyqova

ASTANA. QazAqparat - Búgin QR Memlekettik hatshysy Gúlshara Ábdiqalyqovanyń jetekshiligimen QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy ótti. Onda «Nurly jol-bolashaqqa bastar jol» jańa ekonomıkalyq saıasatyn iske asyrý aıasynda áıelder arasynan joǵary bilikti mamandar daıarlaý máseleleri talqylandy.

Usynylǵan málimetterge qaraǵanda, «Nurly jol» baǵdarlamasynyń aıasynda, sonyń ishinde «Batys Eýropa-Batys Qytaı» halyqaralyq tranzıttik dálizin salý jobasyna 1,5 myń áıel qatysýda. Bul atalǵan jobaǵa tartylǵan barlyq jumysshylardyń on paıyzyn quraıdy. Al «Nurly jol» baǵdarlamasy aıasyndaǵy 12 «shuǵyla» qaǵıdaty (Ortalyq-Ońtústik; Ortalyq-Shyǵys; Ortalyq-Batys) baǵytyndaǵy avtojoldardy salýǵa tartylatyndardyń on paıyzyn nemese shamamen 20 myńnan astamyn áıel azamatshalar quraıtyn bolady.

«Bilim jáne ǵylym mınıstrliginiń aqparatyna sáıkes, «Nurly jol - bolashaqqa bastar jol» memlekettik baǵdarlamasy aıasynda bilim berý baǵdarlamalaryn jańa zerthanalyq jabdyqtardy paıdalana otyryp oqytý qarastyrylady. Bul óz kezeginde ekonomıkamyzdyń qajettilikterine saı keletin joǵary bilikti mamandardy daıarlaýǵa múmkindik beredi. Sonymen qatar, qazirgi tańda áıel azamatshalardy tehnıkalyq mamandyqtarǵa oqytýdyń jáne olardy «Nurly jol» baǵdarlamasyna belsene qatystyrýdyń mańyzy zor», - dedi Memlekettik hatshy.

Otyrys barysynda sonymen birge, balalar-jasóspirimder týrızmin damytý máseleleri de sóz boldy. Budan bólek, 2006-2016 jyldarǵa arnalǵan Genderlik teńdik strategııasyn iske asyrý boıynsha Aqmola oblysy ákimdigi tarapynan qabyldanyp jatqan sharalar da qaraldy.

Talqylaý qorytyndysy boıynsha QR Memlekettik hatshysy QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymy Gúlshara Ábdiqalyqova qaralǵan máseleler boıynsha ortalyq memlekettik organdarǵa birqatar naqty tapsyrmalar berdi.