Áıelderde dırektorlar keńesiniń sheshimine yqpal etý múmkindigi artady - Raýshan Sársembaeva

NUR-SULTAN. QazAqparat – Qazaqstannyń isker áıelderi qaýymdastyǵynyń basshysy Raýshan Sársembaeva Ulttyq qoǵamdyq senim keńesiniń tórtinshi otyrysynda áıelderdi laýazymdy qyzmetke tartýǵa qatysty aıtylǵan usynystarǵa pikir bildirdi, dep habarlaıdy QazAqparat tilshisi.

«Prezıdenttiń korporatıvtik sektorda áıelderdiń laýazymdyq ilgerileýi úshin 30 paıyz kólemindegi kvotany engizýge qatysty aıtqany óte progressıvti norma dep oılaımyn. Osy baǵyttaǵy usynys óte qajet jáne ony biz oń kózqaraspen qabyldadyq. Bul óz kezeginde kompanııalardyń dırektorlar keńesinde názik jandardyń úlesin arttyrýǵa yqpal etedi. Qazir 5-7 paıyz shamasynda bolsa, endi 30 paıyzǵa deıin jetedi. Elimizdegi saýatty, parasatty áıelderde dırektorlar keńesiniń sheshimine yqpal etý, mańyzdy sheshimder qabyldaý múmkindigi bolady», - dedi R. Sársembaeva.

Onyń paıymynsha, ujymda áıelder kóp bolsa, olar ómir sapasyn arttyrýǵa erekshe mán beredi.

«Osy arqyly Qazaqstanda barlyq qajetti qadamdar jasalyp jatqanyn ańǵarýǵa bolady. Sáıkesinshe, bul sharalar genderlik teńdik reıtıngisine de áser etedi. Atalǵan 30 paıyzdyq úles az ýaqyttyń ishinde tıisti kórsetkishterdi arttyrýǵa múmkindik beredi. Osy oraıda áıel adamdar sheshim qabyldaýǵa belsendi qatysady, názik jandardyń basym bóliginiń pikiri túrli áleýmettik jobalardy, zańnamany qabyldaýda nazarǵa alynady. Bul álemdik tájirıbe jáne Memleket basshysynyń arqasynda Qazaqstan osy baǵytta saıası kúsh-jigerin tanytyp otyr», - dedi Raýshan Sársembaeva.

Budan buryn habarlanǵandaı, Ulttyq qoǵamdyq senim keńesiniń tórtinshi otyrysynda Prezıdent Qasym-Jomart Toqaev menshiginde memlekettiń úlesi bar kompanııalarda basshylyqtyń 30 paıyzy áıelder bolýyn mindetteý qajettigi týraly Ulttyq keńes músheleriniń usynysyna nazar aýdardy.

«Biz bul bastamany birtindep júzege asyrý joldaryn qarastyrýymyz kerek dep oılaımyn. Mundaı qadam áıelderdiń bıznes salasyna degen qyzyǵýshylyǵyn arttyrady», – dedi Memleket basshysy.