Áıelder túrli jobaǵa kóbirek qatyssa, oń nátıje bolady – Mandelanyń nemeresi
Atyraý oblysy ákiminiń orynbasary Jasulan Bısembıevtiń málimetinshe, máslıhattarda áıelderdiń úlesi –27-30, memlekettik qyzmette – 80, kvazımemlekettik sektorda – 22, bilim berýde – 92, medıtsınada 60%-dan astamdy qurap otyr. Ár deńgeıdegi basshylyq laýazymdardyń shamamen 40 paıyzyn áıelder atqarady.
Elimizdiń energetıka salasynda da áıelder qatary az emes. Máselen, olardyń úlesi Atyraý munaı óńdeý zaýyty men NCOC kompanııasynda –30, «Teńizshevroıl» JShS-da 35 paıyzdy quraıdy.
Іs-sharaǵa qatysqan G-Global halyqaralyq baǵdarlamasynyń Ońtústik Afrıkadaǵy ókildiginiń jetekshisi Ndıleka Mandela áıelder kóshbasshylyǵyn damytý týraly pikir bildirdi. Ol – sanaly ómirin adam quqyǵy úshin kúresýge arnaǵan, Nobel syılyǵynyń ıegeri, Ońtústik Afrıka Respýblıkasynyń prezıdenti Nelson Mandelanyń nemeresi.
«Qazaqstanda áıelder quqyǵyn qorǵaýda aıtarlyqtaı jetistik bar. Qazir áıelder energetıka salasynda da kóshbasshylyq pozıtsııaǵa ıe bolyp otyr. Túrli jobalardy júzege asyrýǵa áıelder neǵurlym kóbirek qatyssa, soǵurlym oń nátıje bolady. Kóptegen elde genderlik teńsizdik áıelder densaýlyǵy men quqyǵyn damytý baǵytyndaǵy taqyryp aıasynda talqylanyp keledi. Osy máselelerdi talqylaýdan keıin áıelderge óz isimen aınalysý úshin granttar men nesıeler bólindi. Álemniń kóptegen memleketinde áıelder eldiń damýyna belsendi qatysa bastady. Biz áıelderdiń energetıka sektoryndaǵy barlyq jobaǵa qatysýyna múmkindik berýimiz kerek», - deıdi Ndıleka Mandela.
Eske sala ketelik, budan buryn Atyraýlyq mektep túlegi álemniń 15 ýnıversıtetinen oqýǵa shaqyrtý alǵanyn jazǵan edik.