Áıelder nátıjeli jumys jasap, azamattyq jetistiktiń keremet úlgisin kórsetip otyr - QHA
«Qurmetti áıelder qaýymy! Qazaqstan halqy Assambleıasy Sizderdi shuǵylaly kóktemniń alǵashqy merekesi - 8 naýryz - Halyqaralyq áıelder kúnimen shyn júrekten quttyqtaıdy!», dep bastalady quttyqtaý sóz.
Áıelderdiń qoǵam ómirindegi alar orny zor ekendigi atalyp ótilip, kez kelgen qyzmet salasynda nátıjeli jumys jasap, áleýmettik, saıası jáne azamattyq jetistiktiń keremet úlgisin kórsetip otyrǵandyǵyn QHA tilge tıek etedi.
«Aıaýly názik jandar, Sizder álemge meıirimdilik pen izgilik shýaǵyn shashyp, adam balasy úshin eń qasıetti uǵym - jańa ómir men mahabbat syılaısyzdar, urpaq tárbılep, otbasy berekesin keltiresizder.
Búgin sizder osynaý uly boryshty kóppen birge óteý úshin Qazaqstan halqy Assambleıasynyń Analar keńesine birigip otyrsyzdar.
Aýyr da jaýapty mindetti oryndaı otyryp, Sizder únemi názik te súıkimdi, bııazy ári aqkóńil jan bolyp qala beresizder», delingen quttyqtaýda.
Bıyl 1 naýryz kúni el tarıhynda alǵash ret Alǵys aıtý kúnin atap ótildi. Bul meıram bir otbasydaı ómir súrip kele jatqan birtutas Qazaqstan halqynyń ózara senimi men rızashylyǵynyń, zor qurmeti men ózara túsinistiginiń joǵary deńgeıin kórsetken.
«Qadirli analar, apa-sińililer, qyz-kelinshekter, Sizderdiń arqańyzda biz bir-birimizge jylýlyq syılaıtyn rýhanııat qaınaryna baǵyt alyp, meıirimdilik pen izgilik jolyn ustanyp kelemiz.
Osynaý tamasha kóktem merekesinde, Qazaqstan halqy Assambleıasy elimizde saltanat quryp otyrǵan beıbitshilik pen kelisimdi nyǵaıtýdaǵy baǵasyz eńbekterińiz úshin Sizderge zor qurmet bildirip, barlyq otandastarymyz atynan myń alǵys aıtady.
Sizderge myqty densaýlyq, áıel baqytyn, otbasylaryńyzǵa bereke-birlik, amandyq tileımiz!», dep jazady Qazaqstan halqy Assambleıasy.