Áıelder kúresinen nege Olımpıada joldamasyn ala almadyq? — Bas jattyqtyrýshy túsinik berdi

<p>ASTANA. KAZINFORM &ndash; Áıelder kúresi boıynsha bas jattyqtyrýshy Qaırat Saǵadıev Astanada ótken Qazaqstan kúres federatsııasynyń baspasóz máslıhatynda balýan qyzdarymyz ne úshin Olımpıada joldamasyn ıelene almaǵanyn túsindirdi.</p>

Saǵadıevtyń aıtýynsha, tájirıbeli sportshylardyń sporttyq mansabyn aıaqtaýy jáne keı sportshylardyń jaraqaty ulttyq quramaǵa úlken áserin tıgizgen.

- 2023 jyly Olımpıada aldyndaǵy daıyndyq jospary tolyq oryndaldy. Alaıda, olımpıadalyq irikteýge arnalǵan Álem chempıonaty men qytaıda ótken Azııa chempıonaty arasy tym qysqa bolýy bizdiń sportshylarǵa úlken júkteme túsirdi. Tájirıbeli sportshylarymyz Ellada Mahıaddınova(50kg), Nılýfar Raımova (57kg) jáne Elmıra Syzdyqova (76kg) olımpıadalyq salmaqta kúresý kerek bolǵan. Syzdyqovanyń jaraqaty boldy, al Mahıaddınova men Raımova bosanýyna baılanysty demalysqa ketti. Sondyqtan ulttyq quramadaǵy jas sportshylarǵa aýyr júk tústi, olar baryn salyp kúresip shyqty. Chempıonattardaǵy sátsizdikten keıin, biz osy jyldyń aqpan aıynda astanada ótken el birinshiliginde aldaǵy Álem jáne Azııa chempıonattary men Olımpıadalyq irikteý týrnırlaryna qatysatyn ulttyq quram jasaqtadyq. Laýra Ǵanıqyzy (50kg) men Juldyz Eshimova (53kg) syndy myqty sportshylarymyz Azııa irikteý týrnırinde aqtyq synda qarsylastaryna jol berdi, - dedi bas bapker.

Qaırat Saǵadıev otandyq áıelder kúresiniń damýynda úzilis bar ekenin aıtty.

- Eresek qurama komandada bir salmaqta tek birneshe sportshylar ǵana kúresetindikten olarǵa júkteme aýyr bolyp otyr. Sonymen qatar, tájırbeli sportshylarymyzdyń artynda izin basatyn myqty jastar neken-saıaq, - dedi ol.

Buǵan deıin habarlaǵanymyzdaı, Astanadaǵy “Qazaqstan” jeńil atletıka kesheniniń baspasóz ortalyǵynda Respýblıkalyq «Grek-rım, erkin jáne áıelder kúresi federatsııasy» respýblıkalyq qoǵamdyq birlestiginiń aǵymdaǵy qyzmetine qatysty ózekti máselelerge arnalǵan baspasóz máslıhaty ótti.