Áıelder quqyǵy men balalardyń qaýipsizdigine qatysty zań qashan kúshine enedi

<p>ASTANA. KAZINFORM &ndash; QR Bala quqyqtary jónindegi ýákili Dınara Zakıeva áıelderdiń quqyqtary men balalar qaýipsizdigin qamtamasyz etý máseleleri boıynsha ózgertýlerdiń mánin túsindirdi.&nbsp;</p>

Memleket basshysy 2022 jylǵy 16 naýryzdaǵy jáne 2023 jylǵy 1 qyrkúıektegi Qazaqstan halqyna arnaǵan joldaýlarynda áıelder men balalarǵa qatysty zorlyq-zombylyq úshin jazany qatańdatýdy tapsyrǵan edi. 

«Jalpy zańda eki baǵyt boıynsha túzetýler kózdelgen. Birinshiden, otbasylarǵa kómek uıymdastyrý, qıyn jaǵdaıdan shyǵarý fýnktsııasyn áleýmettik basqarmaǵa engizdik. Sebebi buryn ákimdikte bul fýnktsııaǵa jaýapty basqarma bolmaǵan. Qıyn jaǵdaıda turatyn otbasylardy, zorlyq-zombylyqty anyqtap, kómek uıymdastyrý úshin jedel áreket etý toptary qurylady. Eń mańyzdysy – ár aýdanda otbasyn qoldaý ortalyqtary ashylady. Bul ortalyqtar psıhologııalyq, quqyqtyq, áleýmettik kómek uıymdastyrady. Jalpy osy normalar úsh jyl boıy pılottyq rejımde qoldanylady», - dedi D. Zákıeva Ortalyq kommýnıkatsııalar qyzmetinde ótken baspasóz máslıhatynda. 

Sonymen birge zańda erekshe talaptar kózdelgen. Agressorlarmen psıhologııalyq jumys júrgizý, olardy úıden kóshirý, balalar arasyndaǵy zorlyq-zombylyqty, sýıtsıdtik kóńil-kúıdi, býllıngti anyqtaý úshin jáne olarǵa arnaıy kómek uıymdastyrý úshin ár oblysta Psıhologııalyq qoldaý ortalyqtary ashylady. 

Osy zańda jergilikti jerde bala quqyqtary jónindegi ýákilderge qatysty túzetýler kózdelgen. Bul ınstıtýt buryn zańmen bekitilmegen edi. Oǵan qosa, 111 senim telefonyna qatysty normalar kózdelgen. 

Ekinshiden, zańda jazany qatańdatý boıynsha biraz túzetý kózdelgen. Uryp-soǵýǵa jáne densaýlyqqa zııan keltirýge qatysty qylmystyq jaýapkershilik qarastyrylǵan. Ortasha jáne aýyr zııan keltirgeni úshin bas bostandyǵyn shekteý jazasy alynyp tastaldy.

«Balalarǵa qatysty qylmastar boıynsha tatýlasý rásimi de alynyp tastaldy. Buryn qylmystardyń 30% tatýlasýmen jabylatyn. Sonymen qatar, balalarǵa jynystyq sıpatta tıisý degen jańa bap engizildi. Sebebi buryn osy áreketter úshin jaýapkershilik bolmaǵan. Pedofılııaǵa tek qana ómir boıy bas bostandyǵynan aıyrýdy kózdedik. Tergeý barysynda balalarǵa jasalǵan zorlyq-zombylyqqa qatysty qylmystar úshin adamdy birden qamaýǵa alý qarastyrylǵan. Balalarǵa jasalǵan býllıngke jáne balany avtobýstan shyǵaryp jiberý boıynsha ákimshilik jaýapkershilik kózdelgen», - dep túsindirdi spıker. 

Aıta keteıik, 15 sáýirde Prezıdent áıel quqyǵy men balalardyń qaýipsizdigin qamtamasyz etetin zańdarǵa qol qoıdy.