Áıelder isteri jáne otbasylyq-demografııalyq saıasat jónindegi UK men EYDU arasynda yntymaqtastyq týraly memorandým ázirleýge Qazaqstan tarapy múddeli - Memhatshy

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova Ekonomıkalyq yntymaqtastyq jáne damý uıymy (EYDU) bas hatshysynyń orynbasary Marı Kıvınımen jáne Jahandyq baılanystar hatshylyǵynyń basshysy Markos Bontýrımen kelissózder ótkizdi, dep habarlady Aqordanyń baspasóz qyzmetinen.

Kezdesýde bıylǵy qańtarda Qazaqstan Respýblıkasy men EYDU arasynda qol qoıylǵan Seriktestiktiń Eldik Baǵdarlamasy aıasyndaǵy jobalardy qosa barlyq baǵyttaǵy ekijaqty yntymaqtastyqtyń serpindi damýy atap ótildi. Áńgimelesý barysynda Qazaqstannyń áleýmettik damýy, onyń ishinde densaýlyq saqtaý, bilim, genderlik saıasat, statıstıkalyq málimetter almasý máselelerine erekshe nazar aýdaryldy. G.Ábdiqalyqova «Qazaqstan-2050 strategııasynyń, «Nurly Jol» baǵdarlamasynyń jáne Indýstrııalyq-ınnovatsııalyq damý memlekettik baǵdarlamasynyń iske asyrylý barysy týraly baıandady. Memlekettik hatshy QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa men EYDU arasynda yntymaqtastyq týraly memorandým ázirleýge Qazaqstan tarapy múddelilik tanytatynyn jetkizdi. M.Bontýrı Qazaqstan men EYDU arasyndaǵy qyzý dıalogqa, atap aıtsaq, delegatsııalar almasý, qazaqstandyq ókilderdi EYDU beıindik organdarynyń jumystaryna qatystyrý jáne barlyq mejelengen birlesken jobalardy, onyń ishinde Básekege qabilettiliktiń Eýrazııalyq Baǵdarlamasyna engen jobalardy tıimdi iske asyrýǵa qoldaý kórsetýdiń mańyzdylyǵyn aıtty. Sondaı-aq, ol aldaǵy VІІІ Astana ekonomıkalyq forýmyna EYDU delegatsııasynyń basshysy retinde qatysatynyn naqtylady.