Áıelder isi jónindegi ulttyq komıssııa Baıan Esentaevaǵa jaýap berdi

ASTANA. QazAqparat - Qazaqstan Respýblıkasy Prezıdentiniń janyndaǵy Áıelder isi jáne otbasylyq-demografııalyq saıasat jónindegi komıssııa tóraǵasynyń orynbasary Elena Tarasenko «QazAqparat» tilshisimen bolǵan áńgime barysynda prodıýser Baıan Esentaevanyń «zardap shekken soń bir de bir áıelder jónindegi uıym maǵan kómek qolyn sozbady» degen jýyrdaǵy suhbatyna qatysty oıyn aıtty.

«Bul rette, qorlyq kórgen áıelge uıym emes, qorlyq kórgen adamnyń ózi habarlasý kerek. Degenmen, bizde turmystyq zorlyq-zombylyq kórgen áıelderge kómektesetin uıymdardyń óte az ekenin moıyndaımyn. Biraq, zábir kórýshi adam qandaı da bir qaýymdastyqqa, bolmasa, uıymǵa ózi habarlasyp, otbasyndaǵy jaǵdaıdy, neshe jyldan beri turmystyq zorlyq-zombylyqqa shydap júrgenin jetkizýi kerek»,-deıdi Elena Tarasenko.

E.Tarasenkonyń aıtýynsha, sońǵy jyldary Qazaqstanda áıelderge qatysty zorlyq-zombylyqqa tótep berý jumysy kúsheıgen. Biraq, spıkerimiz atap ótkendeı, qaýymdastyqtar men beıimdeý ortalyqtarynyń jumysyn áli jetildirý kerek.

«Jalpy, turmystyq zorlyq-zombylyq kóretin áıelderge kómektesý máselesin alǵash ret osy Ulttyq komıssııa kóterip,  turmystyq zorlyq-zombylyqtyń aldyn alý jónindegi zań jobasyn ázirlegen bolatyn. Ol zańdy Parlament 2009 jyly qabyldady. Biraq, ol zańdy áli jetildire túsý kerek. Qazir Іshki ister mınıstrligi men ulttyq komıssııa jáne de prokýratýra zańdy paıdaly baptarmen tolyqtyrý ústinde»,-deıdi E.Tarasenko.

Aıta keteıik, búgin Astanada «Qazaqstan Respýblıkasyndaǵy otbasy jáne genderlik saıasattyń 2030 jylǵa deıingi tujyrymdamasy» talqylandy. Oǵan Áıelder isi jónindegi ulttyq komıssııanyń músheleri, ártúrli áıelder qaýymdastyǵynyń basshylary, BUU Damý baǵdarlamasynyń ókilderi, shamamen 100 adam qatysyp, genderlik saıasat pen otbasynyń tatýlyǵy týraly oılaryn aıtty. Al, 2016 jyldyń 10 maýsymynda kúıeýi Baqytbek Esentaevtan zorlyq kórip, birneshe jerinen pyshaqtalǵan Baıan Esentaeva jýyrda bergen suhbatynda «aýrýhanada jatqanda áıel quqyǵyn qorǵaıtyn uıymdardyń eshqaısysy maǵan habarlasqan» joq degen bolatyn.