Áıel adamnyń bitimgerlik mıssııaǵa qosar úlesi zor — Ardaq Kúrtibaeva

<p>ALMATY. KAZINFORM &mdash; Búgin bitimgerler kúni. 2002 jyly BUU Bas Assambleıasy 29 mamyrdy halyqaralyq bitimgeler kúni etip bekitti. Osy ýaqytqa deıin 600 otandasymyz uıym operatsııalaryna qatysty. Aıta keteıik, naýryz aıynda 139 qazaqstandyq áskerı Golan jotasyna jiberildi. Olar onda jaýlasqan eki taraptyń arasyndaǵy aýhýaldyń ýshyqpaýyna atsalysyp jatyr.</p>

Qazaqstan bitimgershilik operatsııalar ortalyǵy baspasóz qyzmetinin málimetinshe, bul kún álem boıynsha qyzmet etip júrgen bitimgerlerdiń jan qııarlyqtaryna alǵys bildirýge úndeıdi.

Foto: Keıipkerdiń jeke muraǵatynan

«Qazaqstan turaqtylyq pen qaýipsizdikti jaqtaıtyn el. Osy baǵytta atqarylyp jatqan istiń biri bitimgerlik mıssııasy. Sońǵy 16 jylda Birikken Ulttar Uıymynyń Azııa, Taıaý Shyǵys jáne Afrıka elderindegi 7 bitimgershilik mıssııasyna 600-den astam qazaqstandyq áskerı qatysty. Olar kelisilgen mámile aıasynda jaýapty aımaqtardy kúzetedi, jol tosqaýyldaryn uıymdastyryp, beıbitshilik kelisimderiniń saqtalýyn qamtamasyz etedi», - dep habarlady vedomstvodan.

Qazir qazaqstandyq bitimgerler rotasy Golan jotalarynda. Qarýly kúshterdiń áskerı jasaǵynyń quramynda 139 áskerı qyzmetshi bar. Solardyń biri dáriger Ardaq Kúrtibaeva.

Foto: Keıipkerdiń jeke muraǵatynan

«Áıel adamnyń bitimgerlik mıssııaǵa qosar úlesi zor. Jergilikti halyqpen tezirek til tabysýǵa yqpal ete alady. Qazir Golan jotasynda bitimgerlik operatsııasyna qatysyp jatyrmyn. Mıssııanyń protsesi óte joǵary deńgeıde ótip jatyr. Ár sarbaz óziniń mindetine minsiz atqarýy kerek. Psıhologııalyq, fızıkalyq turǵyda da myqty bolǵany abzal», - deıdi Ardaq Kúrtibaeva.

Aıta keteıik, qazaqstandyq bitimgerler Golan bıigine naýryz aıynda attanǵan bolatyn. 

Qazirgi ýaqytta Batys Saharada 6, Ortalyq Afrıka Respýblıkasynda 2, Kongo Demokratııalyq Respýblıkasynda 2, Lıvanda 9 ofıtser BUU-nyń mıssııalarynda qyzmet etip júr. Golan bıikterine 139 qazaqstandyq áskerı qyzmetshi jiberildi.

Olar onda mıssııa mandatyna sáıkes, qarama-qarsy taraptar arasynda atysty toqtatý rejımin qoldaý jónindegi mindetterdi oryndaıtyn bolady.