Aıdyń topyraǵy tıelgen Qytaı zondy Jerge oralatyn modýlmen túıisti

BEIJІŃ. QazAqparat – Jeksenbi kúni Qytaıdyń «Chane-5» zondy Aı orbıtasynda orbıtalyq jáne oralatyn modýldermen sátti túıisti, dep habarlaıdy QazAqparat tilshisi Qytaı ulttyq ǵarysh basqarmasyna (CNSA) silteme jasap.

Aıdaǵy topyraq úlgileri Jerge oralatyn modýlge aýystyrylyp tıeldi. Jalpy 2 keli regolıt (Aı topyraǵy) jınalǵan.

Eske sala ketsek, «Chane-5» zondy 24 qarashada ushyrylǵan bolatyn. Onyń quramy orbıtalyq, qoný, ushý jáne oralý modýlderinen turady.

1 jeltoqsanda qoný-ushý kesheni Aıǵa qondy, al 3 jeltoqsanda «Chane-5» zondy topyraq úlgilerin jınaýdy aıaqtap, ony ushý modýline apardy.

Oralatyn modýl Qytaıdyń soltústigindegi Іshki Mońǵolııa avtonomdy aýdanyna qonady dep josparlanyp otyr.

«Sınhýa» agenttiginiń habarlaýynsha, «Chane-5» zondyn ushyrý – QHR ǵarysh tarıhyndaǵy eń kúrdeli mıssııalardyń biri.

Bári sátti aıaqtalǵan jaǵdaıda, «Chane-5» zondy 40 jyldan astam ýaqyttan beri birinshi ret Jerge aıdaǵy topyraq úlgilerin ákelgen bolyp esepteledi. Solaısha, Qytaı mundaı mindetti oryndaǵan AQSh pen KSRO-dan keıingi úshinshi el bolmaq.