Aıdyn Aıymbetov Jerge qonǵannan keıin ózin jaqsy sezinýde - Talǵat Musabaev

ASTANA. QazAqparat - Aıdyn Aıymbetov Jerge qonǵannan keıin ózin jaqsy sezinýde. Bul týraly búgin Astana áýejaıynda «Soıýz TMA-16M» ǵarysh kemesiniń halyqaralyq ekıpajymen kezdesýge arnalǵan shara aldynda QR Investıtsııalar jáne damý mınıstrligi Aeroǵarysh komıtetiniń tóraǵasy Talǵat Musabaev málim etti.

Atap aıtqanda, búgin tańerteń Gennadıı Padalka (Reseıǵarysh), qazaqstandyq ǵaryshker Aıdyn Aıymbetov, sondaı-aq Danııanyń alǵashqy astronavty Andreas Mogensen Qazaqstanda eseptelgen aýdan mańyna aman-esen qondy. «Búgin ǵaryshtan taǵy bir qazaq jigiti oraldy. Biz Aıdyndy shyn júrekten quttyqtaımyz. Onyń aldaǵy jumystaryna jemister tileımin. Osy búgingi mańyzdy oqıǵamen barsha otandastarymdy quttyqtaımyn», - dedi T. Musabaev. Onyń sózine qaraǵanda, ǵaryshkerler ekıpajy Qazaqstan jerine aman-esen qondy. «Búgin biz ony Jezqazǵan jazyǵynda kútip aldyq. Ushý sapary sátti ótti dep tolyq aıta alamyz. Qazǵarysh basshysy retinde búgin uzaq ýaqyttan beri josparlaǵan jumysymyzdy aıaǵyna deıin jetkizgenime maqtan tutamyn. Atap aıtqanda, úlken ǵylymı mańyzdy baǵdarlama júzege asyryldy. Osy sharanyń barlyǵy halqymyz Qazaq handyǵynyń 550 jyldyǵy mereıtoıyn atap ótý kezinde iske asyryldy», - dedi Qazǵarysh basshysy. Sonymen qatar ol Aıdyn Aıymbetov Qazaqstan Týyn Elbasyǵa tapsyratyndyǵyn atap ótti. Esterińizge sala keteıik, A. Aıymbetov ǵaryshqa Qazaq handyǵynyń 550 jyldyǵyna, Qazaqstan halqy Assambleıasynyń 20 jyldyǵyna arnalǵan týlar men elimizdiń kók baıraǵyn alyp ushqan bolatyn.