Aıdyn Aıymbetov: Maqsatymyz - álemdik naryqta sapaly qyzmetter kórsetý

ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev elimizdiń úshinshi ǵaryshkeri, Halyq Qaharmany, general-maıor, «Qazaqstan Ǵarysh Sapary» ulttyq kompanııasynyń vıtse-prezıdenti Aıdyn Aıymbetovpen kezdesti, dep habarlaıdy QazAqparat ákimdiktiń baspasóz qyzmetine silteme jasap.

Kezdesý barysynda taraptar «Qazaqstan Ǵarysh Sapary» AQ-nyń joǵary dáldikti spýtnıktik navıgatsııa júıesiniń jerústi ınfraqurylymyn paıdalaný, navıgatsııalyq qyzmet kórsetý baǵytynda pikir almasty. Osy rette ǵaryshker atalǵan kompanııanyń Ońtústik Qazaqstan oblysynyń aýyl sharýashylyǵy, jer ınpektsııasy, tótenshe jaǵdaılardyń aldyn alý sharalaryna spýtnıktik navıgatsııalyq qyzmet kórsete alatynyn jetkizdi.
 

 «Elimizde «Qazaqstan Ǵarysh Sapary» ulttyq kompanııasy» aktsıonerlik qoǵamy memlekettiń júz paıyz qatysýymen 2005 jyly qurylǵan bolatyn. Kompanııanyń maqsaty -  2020 jylǵa qaraı joǵary tehnologııalyq, qarqyndy damyp kele jatqan, básekege qabiletti ǵarysh júıelerin derbes jobalaýǵa, jasaýǵa jáne paıdalanýǵa, ári óńirlik jáne dúnıejúzilik naryqtarda talap etiletin sapaly qyzmetter kórsetý bolyp tabylady. Bul rette bizdiń kompanııa Ońtústik Qazaqstan oblysynyń damýshy salalaryna óziniń úlesin qosa alady»- dedi Aıdyn Aıymbetov.
 

Ǵaryshkerdiń usynysyn qabyl alǵan óńir basshysy oblystyń tynys-tirshiligin baıandap berdi.

«Siz qazaq halqynyń úlgi tutar azamatynyń birisiz.  Ońtústik Qazaqstan oblysynyń agrarlyq áleýeti orasan. Qazir osy saladaǵy áleýetterimizdi keńinen paıdalanýǵa kúsh salyp jatyrmyz. Aldaǵy ýaqytta jer ıgerý sekildi ózekti máselelerde «Qazaqstan Ǵarysh Sapary» ulttyq kompanııasyń qyzmetterin paıdalanýǵa múddeli ekenimizdi jetkizgim keledi», - dedi Janseıit Túımebaev.
 

Óz kezeginde Halyq Qaharmany Aıdyn Aıymbetov te zor yqylaspen qarsy alǵan oblys basshylyǵyna erekshe rızashylyǵyn bildirdi.