Aıdyn Aıymbetov ǵaryshtaǵy salmaqsyzdyq jaǵdaıyndaǵy áserimen bólisti
«Ǵarysh kemesi birinshi ǵaryshtyq jyldamdyqqa shyqqan kezde, salmaqsyzdyq bastalady. Osy sátte ǵajaıyp kórinisterge kýá bolasyzdar, ıaǵnı keme sterıldi tazartylǵan bolsa da shań-tozańnyń túıirshikteri, usaq-túıek zattar áýede qalqyp ketedi. Osyndaı sátterde jáne ǵaryshtaǵy basqa da kórinisterden keıin erekshe sezimge bólenesiń», - deıdi ǵaryshker.
Onyń sózine qaraǵanda, salmaqsyzdyq jaǵdaıyna adam aǵzasy birneshe saǵattan keıin beıimdeledi.
«Aıta keter jaıt, osyndaı kezde ózińdi aıtarlyqtaı jaǵymdy sezinbeısiń, ıaǵnı aǵzanyń beıimdelý úderisi júrip jatady. Keme túrli azyq-túlikter, ǵylymı jabdyqtarmen toltyrylǵandyqtan, onda bos oryn tym az bolady. Ǵaryshqa sapardaǵy osy eki táýlikte tarshylyqta bolasyń», - dep baıandady A. Aıymbetov.
Osy oraıda ol Halyqaralyq ǵarysh stansasyna ushyp kelgennen keıin adam jeńildikti sezinetinin jetkizdi. «Ótpeli esikter ashylý kezinde biz stansaǵa ushyp keldik. Osy sátte adamnyń qolymen jasalǵan keń qurylysty kórip ishteı maqtanysh sezimine bólenesiń», - deıdi ǵaryshker.
A. Aıymbetov stansadaǵy biraz ýaqyttan keıin Jerge asyqqanyn, ıaǵnı aıaǵymen jerdiń keńdigin sezingisi kelgenin aıtyp berdi.
Eske sala keteıik, qazaqstandyq ǵaryshker Halyqaralyq ǵarysh stansasyna 2015 jyldyń 2 qyrkúıeginde ushty. Ol «Soıýz TMA-18M» zymyranynyń bort-ınjeneri qyzmetin atqardy. Sonymen qatar ǵaryshta Qazaqstannyń ǵylymı zertteýlerin júrgizgen bolatyn.
Qazaqstandyqtyń ǵaryshta ótkizgen ýaqyty - 9 táýlik 20 saǵat 13 mınýt 51 sekýnd.
Ǵarysh keńistigin ıgerýge sińirgen asa zor eńbegi, ǵaryshqa ushý kezinde kórsetken batyrlyǵy men erligi úshin Qazaqstan Respýblıkasynyń ǵaryshkeri Aıdyn Aqanuly Aıymbetovke «Halyq qaharmany» ataǵy berilip, aıryqsha erekshelik belgisi - Altyn Juldyz ben «Otan» ordeni tapsyryldy.