Aıdos Sarym Joldaý týraly: Prezıdent haıp qýǵandarǵa jaýap berdi
«Joldaýdyń memlekettik mańyzynan bólek, sońǵy ýaqytta elimizde oryn alyp jatqan túrli jaıttarǵa qatysty Prezıdenttiń bergen jaýaby sekildi. Onyń Olımpıadaǵa qatysty, ınternet betterinde júrgen basqa da haıp taqyrypty qýǵandarǵa Memleket basshysy óz oıyn, pozıtsııasyn Joldaý arqyly jetkizip, jaýap berdi. Joldaýdyń júgi atqarýshy jáne zań shyǵarýshy organdarǵa túsip otyr. Memleket basshysy jyldyń sońyna deıin naqty josparlar qurýmen qatar birneshe zań qabyldaý kerektigin tapsyrdy. Onyń ishinde áńgime bıýdjetke de qatysty bolyp otyr. Joldaýdan keıin aldaǵy 2-3 jyldyń bıýdjeti qaıta qaralatyn sekildi. Sebebi Toqaev el bıýdjetiniń júıesizdigin de synady», - dedi Aıdos Sarym QR Sybaılas jemqorlyqqa qarsy is-qımyl agenttiginde ótken «Antikor Live» jobasynyń efırinde.
Halyq qalaýlysynyń oıynsha, Memleket basshysy Joldaýda qoǵamdy jıi tolǵandyratyn túıtkilderdi kóterdi.
«Aıtar bolsaq, qoǵamda jıi talqyǵa túsip júrgen, atom energııasy, jer jáne til máselesin Prezıdent nazardan tys qaldyrǵan emes. Joldaý ishinde buryn qozǵalmaǵan taǵy bir sát, zııaly qaýym máselesi. Memleket basshysy óz sózinde zııaly qaýymdy qoldaý kerektigin, olar bılik pen halyqty jalǵaıtyn orta ekenin eskertti. Endigi maqsat - aıtylǵan nárseni oryndaý. Prezıdent tapsyrmalaryna qatań baqylaý ornatý kerek. Kerek jerinde qattyraq aıtyp otyrǵan da jón», - deıdi ol.