Aıdos Sarym: Prezıdent 180 kúndi belgiledi, osy ýaqyt ishinde jaǵdaıdy birjaqty qylý kerek

NUR-SULTAN. QazAqparat – QR Parlamenti Májilisiniń depýtaty Aıdos Sarym eldegi qazirgi jaǵdaı, Prezıdent málimdemesi men Úkimet otstavkaǵa ketýine qatysty pikir bildirdi, dep habarlaıdy QazAqparat tilshisi.

«Gaz baǵasynyń qymbattaýyna qatysty halyqtyń talaby oryndy dep oılaımyn. Jalpy elde ekonomıkalyq sheshim qabyldar kezde, onyń áleýmettik-saıası tusyn da umytpaǵan jón. Halyq taǵdyry men múddesine qatysty zań, reforma nemese sheshim qabyldar aldynda jurtty habardar etken durys. ıAǵnı biz jospar quryp, sheshim qabyldaǵan kezde aldymen adamnyń múddesin eskerýimiz qajet. Sosyn halyq úshin iske asyp jatqany sharany artyq-kem tusyn saralap, aprobatsııadan ótkizý kerek. Taǵy bir mańyzdy dúnıe, bolyp jáne bolaıyn dep jatqan jaıt týraly halyqty jan-jaqty aqparattandyrý mańyzdy», - dedi Aıdos Sarym.

Onyń aıtýynsha, endi jasaqtalatyn Úkimet joǵary aıtylǵan jaıttardy nazarǵa alǵan jón.

«Búgin Memleket basshysy qozǵaǵan taǵy bir mańyzdy másele jeke tulǵalardyń ózin bankrot dep jarııalaı alýy. Ómirde túrli jaǵdaı bolyp jatady, adamdar qaryzǵa batyp jatady nemese nesıesin ýaqytyly tóleı almaýy múmkin. Sondaı jaǵdaıda tek zańdy tulǵalar emes jeke tulǵalar da ózin bankrot dep tanyp, jeke máseleni sheshýdiń bir joly. Jáne bul biraz elderde bar praktıka. Kommýnaldyq tarıfterdiń baǵasy da ýaqytyly kóterilip otyr. Sebebi onyń salmaǵy baıaǵy halyqtyń qaltasyna túsedi. Jáne Prezıdent 180 kúndi belgilep otyr, ıaǵnı osy ýaqyttyń ishinde jaǵdaıdy birjaqty qylý kerek. Bul Úkimetke júkteletin mindet», - deıdi ol.

Odan bólek, halyq qalaýlysy Úkimettiń otstavkaǵa ketýine qatysty óz oıyn bildirdi.

«Óz basym Premer-Mınıstr durys sheshim qabyldady dep esepteımin. Úkimet basshysynyń jaýapkershilikti óz moınyna alyp, otstavkaǵa ketýi zańdy ári azamattyq sheshim dep oılaımyn. Búginde Úkimettiń jańa quramyn jasaqtaýǵa kirisip jatyr, jýyrda fraktsııa otyrysy ótedi», - dedi A. Sarym.

Sondaı-aq, Májilis depýtaty quqyq qorǵaý organdary áleýmettik jelide tarap jatqan túrli aqparattar men vıdeolarǵa saraptama júrgizý kerektigin aıtty.

«Arandatýshylyqtan aýlaq bolý kerek. ıAǵnı halyqty shatastyrýǵa jol bermeý qajet. El ishinde iritki salmaý úshin jelide tarap jatqan aqparattardy saralaǵan jón. Tek resmı derekterge súıenip, feık aqparattardan aýlaq bolǵanymyz durys», - dedi ol.

Aıta ketsek, búgin Memleket basshysy elimizdegi áleýmettik-ekonomıkalyq jaǵdaıǵa qatysty keńes ótkizip, qazirgi jaǵdaıdy turaqtandyrýǵa baǵyttalǵan eń aldymen atqarylatyn sharalar týraly baıandady.