Aıdos Sarym: Qoǵamnyń alańdaýshylyǵyna Prezıdenttiń sheshimi arqyly naqty jaýap berildi
«Egemen Qazaqstan» gazetine bergen shaǵyn suhbatynda belgili saıasattanýshy Aıdos Sarym osylaı degen eken.
Gazet tilshisi Prezıdenttiń Aqordadaǵy Jumys tobymen ótkizgen qorytyndy otyrysyna qatysty pikir suraǵan bolatyn. Osyǵan oraı saıasattanýshy elimizdegi múlik máselesine, onyń ústine, ótken jylǵy jer máselesine qatysty mıtıngilerdiń áseri bolar, biraz alańdaýshylyq, tipti, biraz tolqý da bolǵanyn aıtady.
«Birqatar bedeldi azamattar qyzdy-qyzdymen qatty-qatty áńgimeler de aıtyp qaldy. Asyqpaı ótkizilgen qoǵamdyq talqylaýlardyń barysyn, barlyq jaǵdaıyn eskerip, kúni keshe Elbasymyz Qazaqstan Respýblıkasynyń Tuńǵysh Prezıdenti Nursultan Nazarbaev bul máseleni odan ári qozǵaýdyń qajeti joq, 26-bap burynǵy nusqasynda qalsyn dep, ózgeris engizbeýdi usyndy. Bul bizdiń elimizdegi azamattyq qoǵamnyń, zııaly qaýymnyń pikirine, alańdaýshylyǵyna túsinistikpen qarap, naqty reaktsııa berý, ún qatý dep oılaımyn. Jáne de bul bıliktiń de, azamattyq qoǵamnyń da jaýapkershiliginiń ýaqyt talabyna saı artqanynyń belgisi der edim», - dep jaýap beredi.
Saıasattanýshynyń paıymynsha, negizinen búkil másele, talap etilgen konstıtýtsııalyq ózgerister týraly áńgime bılik ókiletikteriniń tıisti tarmaqtaryna qatysty bolyp otyr. Al qalǵan baptary burynǵy Qazaqstan Respýblıkasy Konstıtýtsııasynyń 1995 jylǵy referendýmda qabyldanǵan kúıinde qalmaq degen sóz.
«Talqylaý kezinde eldiń nazary «árkim» degen sózge aýyp, onyń kóleńkesinde sheteldikterge degen oıdyń astasqany ras. Jer jáne basqa da máselelerge túpkilikti ekonomıkalyq másele sheshilmeı barýdyń erte ekendigi de buǵan deıin san ret aıtyldy. Moratorıı qoıyldy. Sol sebepti de, halyqtyń ishinde, qoǵamdyq ortada osydan soń da bılik sol burynǵy áńgimesin qaıtadan bastap kete me degen qorqynyshtyń bolǵany da aqıqat. Prezıdenttiń keshegi Jumys tobymen bolǵan basqosýynda munyń barlyǵyna naqty jaýap berildi dep oılaımyn. Endigi jerde barlyq másele bıliktiń ókilettikterine jáne onyń basqa da salalas tarmaqtaryna qatysty bolady», - deıdi Aıdos Sarym.