Aıdos Sarym: áleýmettik jelini anarhııa keńistigi deý – aqymaqtyq

ASTANA. QazAqparat – Májilis depýtaty Aıdos Sarym ınternette jáne áleýmettik jelilerde taralatyn aqparattar úshin jaýapkershilikke qatysty, ıaǵnı «Syrym-Zakıeva túzetýleri» dep atalyp ketken zań jobasy aıasyndaǵy normalar týraly óz oıymen bólisti, dep habarlaıdy QazAqparat tilshisi.

Bul jerde adamdy jazalaý mindeti turǵan joq. Múmkin ol qatelesken shyǵar?! Bul jerde jazba avtorynyń nemese rastalmaǵan aqparatty taratýshynyń aıybyn moıyndatýǵa múmkindik berý. Eger jaǵdaı qaıtalansa nemese turaqty ádetke aınalsa, onda is basqasha qaralady. Sonymen qatar, eldiń tutastyǵyna, egemendigine kúmán keltirý degen máselege de mán berip jatyrmyz. Bul da kerek dúnıe. Kórip otyrsyz, eldiń ishinde separatıstik kózqarastary úshin sottalyp jatqandar bar. Ásirese, soltústik aımaqtarda, bul da kóp nárseni ańǵartady. Jalpy, biz bılikti nemese belgili bir sheneýnikterdi unatpaýymyz múmkin, teris, synı kózqarasta bolatyn shyǵarmyz. Biraq, memlekettiń negizin joqqa shyǵarýǵa quqyǵymyz joq. Óıtkeni, azamattardyń quqyǵyn memleket qorǵaıdy

, - dedi Aıdos Sarym Májilistiń kýlýarynda QazAqparat tilshisiniń saýalyna jaýap bere turyp.

Onyń aıtýynsha, ınternet keńistiktegi dúnıeler zańmen rettelýi tıis.

Internet jáne áleýmettik jelilerdi anarhııalyq keńistik dep qaraý – aqymaqtyq. Ómirde qandaı tyıym bar, ol ınternetke de qatysty bolýy kerek. Ómir men ınternet áleminde teńdik bolýy tıis

, - deıdi depýtat.