Aıdos Sarym 3 oblystyń qurylýy týraly: Halyqtyń eńsesin kóterip, bolashaqqa degen senimin kúsheıtti

NUR-SULTAN. QazAqparat – QR Parlamenti Májilisiniń depýtaty Aıdos Sarym Memleket basshysynyń jańa Joldaýyna qatysty pikir bildirdi, dep habarlaıdy QazAqparat tilshisi.

«Qańtar oqıǵasynan keıin kópshiliktiń kóńilinde endigi eldiń jaǵdaıy ne bolady? degen saýal týyndady. Biraq, ózderińiz kórip júrgendeı qańtar oqıǵasynan keıin Prezıdenttiń halyq aldyna ózi shyǵyp, jaǵdaıdy jetkizýi kóptegen kúmán, daqpyrt pen qaýesetti joqqa shyǵardy. Sońǵy saıası oqıǵalarǵa baılanysty qoǵamda kútpegen jaǵdaılar bolyp jatyr. Osyndaı jaǵdaıda ekonomıkany damytý úshin, jańa saıası reformalar qajet. Keshegi joldaý sonyń kýási. Óıtkeni, bizdiń baıqap otyrmyz Qazaqstannyń ekonomıkalyq damý modeli óziniń shegine jetti. Bizge odan ári damý úshin jańa energııa kózi kerek», - dedi Aıdos Sarym ortalyq kommýnıkatsııalar qyzmeti alańynda ótken dóńgelek ústelde.

Májilis depýtatynyń aıtýynsha, Prezıdenttiń jańa Joldaýyndaǵy basty qýantarlyq dúnıeniń biri jańa oblys ortalyqtarynyń qurylýy.

«Jańadan qurylǵan 3 oblystyń jyry 25 jyl boıy aıtylyp kele jatqan jaıt. Jańa oblys bolý sol aımaqta turyp jatqan halyqtyń eńsesin kóterip, bolashaqqa degen senimin kúsheıtti. Osy jáne ózge de saıası reformalar elimizde qalyptasqan saıası básekelestik erejelerin qaıta jasaqtady desek bolady. Mundaǵy maqsat - saıası alańdy jańartý, ishki saıasat alańyna jańa oıynshylardyń kelýine múmkindik berý. Endi bizge Memleket basshysy jiktep birgen jaıttardy iske asyrýymyz qaldy. Máseleni Konstıtýtsııaǵa ózgerister engizýden bastaý kerek oılaımyn», - deıdi ol.

Aıta keteıik, qazir QR Prezıdenti janyndaǵy ortalyq kommýnıkatsııalar qyzmeti alańynda otandyq sarapshylar Memleket basshysynyń halyqqa arnalǵan jańa Joldaýyn talqylap jatyr.