Aıdos Sarym Bıshimbaev isindegi sýdıaǵa qysym jasaý faktisi týraly pikir bildirdi

<p>ASTANA. KAZINFORM &ndash; Májilis depýtaty Aıdos Sarym azamattyq nekedegi áıelin asqan qatygezdikpen óltirdi dep aıyptalǵan eks-mınıstr Qýandyq Bıshimbaevtyń isin júrgizip kele jatqan sýdıa Aıjan Qulbaevanyń telefonyna belgisiz telefonnan túsken qorqytý habarlamalary týraly pikir bildirdi.</p>

«Eger sýdıaǵa aıyptalýshy taraptan belgili bir dárejede qorqytý, ses kórsetý degen sııaqty nárse bolsa, oǵan qosymsha qylmystyq is qozǵalý kerek, ol prokýratýranyń quzyrynda. Sýdıanyń quqyǵy, mártebesi týraly arnaıy konstıtýtsııalyq zań bar. Sol boıynsha prokýratýraǵa shaǵymdansa, taǵylyp otyrǵan aıyptary ońaı emes qoı, soǵan keminde 5-7 jylǵa deıin aıyp taǵylyp, túrmede otyrýy múmkin. Endi onsyz da túrmege otyratyn sııaqty ǵoı. Biraq qosymsha salmaq bolýy yqtımal», - dedi depýtat.

Aıdos Sarym mundaı áreketti zańdy óreskel buzý dep baǵalaıtynyn aıtty.

«Bul kórgensizdik, basqa másele emes, zańdy óreskel buzý, qylmystyq is. Meıli ol shahter bolsyn, keshegi mınıstr bolsyn, sot barysynda sýdıaǵa qoqan-loqqy jasap, qorqytyp úrkitse, óte aýyr qylmystyń biri bolyp esepteledi», - dedi ol.

Eske salaıyq, búgin Joǵarǵy sot Bıshimbaev pen Baıjanovtyń isin júrgizgen sýdıa Aıjan Qulbaevaǵa belgisiz nómirden qońyraýlar men qorqytý habarlamalary túskenin málimdedi.