Aıdos Erbosynulynyń álem chempıony ataǵy úshin aıqasyn qaıdan kórýge bolady

ASTANA. QazAqparat – «Habar» telearnasy qazaqstandyq boksshy Aıdos Erbosynulynyń kýbalyq Davıd Morrelmen (7-0, 6KO) tıtýldyq jekpe-jegin tikeleı efırden kórsetedi, dep habarlaıdy QazAqparat Kazproboxing Instagram-paraqshasyna silteme jasap.

Erbosynuly-Morrel aıqasy 6 qarasha kúni tańerteń AQSh-tyń Mınneapolıs qalasynda bolady. Bastalýy – astana ýaqytymen saǵat 08.00-de. Jekpe-jek Kýba boksshysyna tıesili WBA Super nusqasy boıynsha álemniń «turaqty» chempıony beldigi úshin ótedi.

Aıta keteıik, qazaqstandyq boksshynyń rıngke shyqpaǵanyna bir jyldan asty: 2021 jyldyń qyrkúıeginde ol Gaıana eliniń ókili Lennoks Allenmen (22-2-1, 14KO) qolǵap túıistirip, ony onynshy raýndta nokaýtqa jiberdi. Ekinshi orta salmaqtaǵy Aıdos Dúnıejúzilik boks qaýymdastyǵynyń (WBA) qazirgi reıtıngisinde 1-orynda tur.

Erbosynuly-Morrel kezdesýiniń anderkardynda taǵy bir qazaqstandyq óner kórsetedi – áýesqoı boksta ulttyq quramanyń eks-kapıtany Abylaıhan Júsipov profıdegi ekinshi aıqasyn ótkizedi.

Eske salaıyq, qazaqstandyqtar 13 qarasha kúni tańerteń Jánibek Álimhanulynyń (12-0, 8KO) brıtanııalyq Denzel Bentlıge (17-1-1, 14KO) qarsy jekpe-jegin de tikeleı efırden kóre alady.