Aıdarbek Qojanazarov ShQO sharýalarynyń shaǵymdarymen tanysty
Jıynda Respublica partııasynyń tóraǵasy saılaýshylardan túsetin shaǵymdardy kóterdi, sonyń ishinde sharýalarǵa sýbsıdııalardyń ýaqtyly tólenbeýi. Óz kezeginde Shyǵys Qazaqstan oblysynyń aýyl sharýashylyǵy taýar óndirýshileri suraqtaryn qoıyp, usynystaryn aıtty.
Maıly daqyldar sharýashylyǵynyń bas dırektory Farıd Ábitaev shyǵys óńiri tuqym selektsııasy habyna aınalyp, búkil Qazaqstandy sapaly tuqymmen qamtamasyz ete alatynyn atap ótti. Degenmen bul úshin sýbsıdııalaý júıesin qaıta qaraý arqyly otandyq malshylardy qoldaý qajet.
«Vostok-Moloko» korporatsııasynyń bas dırektory Seıiljan Saılaýbaev mal sharýashylyǵynda qordalanyp qalǵan máselelerdi kóterdi. Bul – malǵa brýtsellez aýrýynyń taralýy, respýblıkalyq veterınarııalyq zerthanalar jumysyndaǵy máseleler, janýarlardy ıdentıfıkatsııalaý máseleleri, mal qozǵalysyn baqylaý qajettiligi, veterınarııalyq pýnktterdi qarjylandyrý, veterınarııalyq baqylaý júıesiniń qurylymy. Kásiporyn basshysy elge Veterınarııa agenttiginiń qajet ekenin aıtty.
Jıyn barysynda sóz alǵan Standarttaý jáne sertıfıkattaý ulttyq ortalyǵy oblystyq fılıalynyń basshysy Maıra Sadyqova ortalyq zerthanalaryn zamanaýı zertteýlerdi jyldam júrgizýge múmkindik beretin qural-jabdyqtarmen jabdyqtaý qajettigin ortaǵa saldy. Merınos júninen taýar óndiretin «Bizdiki» seriktestigi otandyq taýardy iri saýda jelileri arqyly ótkizý úshin saýda ornyn qymbatqa jalǵa berý máselesin de jetkizdi.
– Óńirde másele kóp. Sonyń biri – jaıylymnyń joqtyǵy, jer berilgennen keıin ereje qabyldanǵan soń jerdi qaıtaryp alý. Batys Qazaqstan oblysynda búginde sharýalar kótergen mundaı máseleler is júzinde sheshimin tapty. Bizdiń partııa aıaqqa nyq turǵan shaǵyn bıznes elimizdiń bolashaǵy ekenin jaqsy túsinedi. Biz kásipkerlerdiń múddesin qorǵaýdamyz, – dep túıindedi sózin Aıdarbek Qojanazarov.
Óńirlerde kóterilgen máselelerdi Májilistegi partııa fraktsııasy aldaǵy ýaqytta nazarǵa alatynyn aıtty.