Aıdarbek Qojanazarov: Mınıstrlikterdi bólý – sol mınıstrlerdiń jumysyna berilgen baǵa

ASTANA. QazAqparat – Mınıstrlikterdi bólý týraly sheshim - sol vedomstvo basshylarynyń jumysyna berilgen baǵa deýge bolady. Májilis depýtaty Aıdarbek Qojanazarov Parlament palatalarynyń birlesken otyrysynan keıin osyndaı pikir bildirdi, dep habarlaıdy QazAqparat tilshisi.

«Men vedomstvosyn bólshektep, qyzmetiniń bir bóligin ajyratyp jatqan mınıstr ózin qalaı sezinip otyr eken dep oıladym. Bul - oǵan berilgen baǵa ǵoı. «Keshir, bul másele qolyńnan kelmedi, ol qyzmetti senen alamyz, qalǵan jumysty atqara ber» degen sóz sııaqty», - dedi depýtat.

Sondaı-aq, ol sý resýrstary máselesin úsh aı buryn kóterip, jeke bir mınıstrlik ashý týraly bastama kótergenin aıtady.

«Ortalyq Azııa elderiniń arasynda sýǵa baılanysty kıkiljiń bolady degen boljamdar kóp. Bul máseleni qazirden bastap kótermesek, kelispeýshilikten qutylmaımyz», - deıdi Aıdarbek Qojanazarov.