«Aıbyn» halyqaralyq áskerı-patrıottyq jastar jıyny bastaldy

ASTANA. QazAqparat - Qaraǵandy oblysynyń «Spassk» oqý ortalyǵynda bıyl halyqaralyq mártebege ıe bolǵan toǵyzynshy áskerı-patrıottyq jastar jıynynyń saltanatty ashylý rásimi ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Jas patrıottar jıyny qarsańynda ótken «Ádiletti Qazaqstan – Adal azamat» taqyrybyndaǵy Ulttyq quryltaıdyń ekinshi otyrysynda Qazaqstan Respýblıkasynyń Prezıdenti Qasym-Jomart Toqaev balalar men jasóspirimder uıymdarynyń qyzmetine serpin berý qajettigi týraly aıtty. Osy turǵyda Qorǵanys mınıstrligi turaqty túrde ótkizip turatyn halyqaralyq jastar jıyny bul jumystyń belgili bir nátıjesin kórsetse kerek.

Saltanatty rásim aıasynda «Birlik ordasy» mobıldi-kórme ekspozıtsııasynyń tusaýkeseri, balalardyń «Otan. Ásker. Jas sarbaz» sýret kórmesi, sondaı-aq «Aıbyn – dostyq mekeni» alleıasyna aǵash otyrǵyzý sharasy ótti.

Jıynnyń ashylý saltanatyna Qaraǵandy oblysynyń ákimi Ermaǵanbet Bólekpaev, Parlament depýtattary Sergeı Ershov, Bolat Kerimbek, Álisher Satvaldıev, Qorǵanys mınıstriniń orynbasarlary general-leıtenant Sultan Qamaletdınov jáne general-leıtenant Muhamedjan Talasov, Ázerbaıjan men Ózbekstannan kelgen sheteldik qonaqtar, Qarýly kúshterdiń ardagerleri, elimizdiń áskerı-patrıottyq klýbtary men oqý oryndarynyń tárbıelenýshileri qatysty.

Qorǵanys mınıstriniń orynbasary general-leıtenant Sultan Qamaletdınov mańyzdy is-sharany asha otyryp, jıyndy ótkizý ıdeıasyn qoldaǵan Ázerbaıjan men Ózbekstandyq áriptesterine rızashylyǵyn bildirdi. Ol bizdiń halyqtarymyzdyń arasyndaǵy tarıhı tyǵyz baılanys ǵasyrlar boıy qalyptasyp kele jatqanyn atap ótti.

– Biz kóptegen taǵdyrly synaqtardan birge ótip, ata-babalarymyzdyń dástúrlerin, qundylyqtary men mádenı-rýhanı muralaryn saqtaı aldyq. Búgingi jıyn da tarıhı dostyqtyń qısyndy jalǵasy bolyp tabylady, –dep atap ótti.

Óz kezeginde Ázerbaıjan men Ózbekstan delegatsııalarynyń basshylary sóz sóılep, jas patrıottar jıynynyń mańyzdylyǵyna toqtaldy.

«Aıbyn» ánuranynyń aıasynda jarystyń týyn kóterý qurmetine Jetisý oblysy «Jetisý tarlandary» áskerı-patrıottyq klýbynyń kapıtany Baıǵabyl Meıirjan ıe boldy. Bul komanda «Aıbyn-2022» jıynnyń jeńimpazy atanǵan bolatyn.

Rásimniń resmı bóligi aıaqtalǵan soń qatysýshylar men qonaqtar úshin «Torýyl» rotalyq taktıkalyq toby bólimsheniń «zańsyz qarýly qurylymdy» joıýdaǵy úılesimdi qımylyn kórsetti. Maıdandyq avıatsııa ushqyshtary joǵary pılotaj fıgýralaryn oryndady.

Іs-shara Qazaqstan Qarýly kúshteri Ulttyq áskerı-patrıottyq ortalyǵy ónerpazdarynyń kúshimen daıyndalǵan kontsertpen jáne jıynǵa qatysýshylardyń oryndaýyndaǵy «Aıbyndy armııa» ánimen aıaqtaldy. Alda tartysty jarystar men qyzyqty mádenı-demalys baǵdarlamasy bar.