«Aıbyn» áskerı-patrıottyq jıynyna 52 boıjetken qatysady (FOTO)

ASTANA. QazAqparat - Erteń Qaraǵandy oblysyna qarasty «Spassk» oqý-jattyǵý ortalyǵynda «Aıbyn» ekinshi respýblıkalyq áskerı-patrıottyq jastar jıyny bastalady.

QR Qorǵanys mınıstrliginiń baspasóz qyzmetiniń habarlaýynsha, atalǵan jıynǵa áskerı-patrıottyq klýbtardyń, respýblıkalyq (oblystyq) mektep-ınternattardyń tárbıelenýshileri, joǵarǵy oqý oryndaryndaǵy áskerı kafedralardyń stýdentteri qatysady.

Bıylǵy jyly osy is-sharaǵa alǵash ret joǵary oqý oryndarynyń áskerı kafedralarynan 52 qyz bala qatysady. Qazaqstannyń barlyq aımaǵynan sharaǵa 800-den asa adam qatysady dep josparlanyp otyr. Atalǵan jıyn barysynda áskerı-qoldanbaly sport túri jáne jaýyngerlik daıarlyq, áskerılendirilgen oıyndar, sondaı-aq ıntellektýaldyq baıqaýlar men basqa da jarystar ótedi.

Bıyl áskerı-patrıottyq jıynnyń baǵdarlamasyna jańa ózgerister engizildi. Ótken jylmen salystyrǵanda áskerı-sport túri boıynsha jarystar sany eki esege azaıdy. Sonymen qatar jas býynnyń zııatkerlik jáne ıntellektýaldyq qabiletine erekshe nazar aýdarylatyn bolady. qatysýshylar ózderiniń dene mashyqtaryn tolyq kórsetýi qajet.

Áskerı-patrıottyq jıynda «Meniń robotym» baıqaýy boıynsha ár top robot úlgileri men robottalǵan júıeniń úlgilerin, sondaı-aq ushý apparattarynyń jobalaryn kórsetedi.

«Aıbyn» jıynyna qatysýshylar elimizdegi tanymal tulǵalarmen tanysa otyryp elimizdiń qalyptasýy týraly qysqa metrajdy fılmder festıvalinde óz talanattaryn kórsete alady. Budan ózge, kórsetilim sabaqtarynda qarý-jaraq, áskerı tehnıka men jabdyqtar, «Arlan», «Nomad» brondy transporterleri, komandalyq-shtabtyq mashınalardyń jańa úlgileri kórsetiledi.