«Aıbyn-2023» IX halyqaralyq áskerı-patrıottyq jastar jıyny qorytyndylandy

ASTANA. QazAqparat - Qaraǵandy oblysynda Ázerbaıjan men Ózbekstan komandalarynyń qatysýymen Jas qazaqstandyq patrıottar jıyny aıaqtaldy. Bıylǵy is-shara Astananyń 25 jyldyǵyna arnaldy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Jıynnyń jabylý saltanatyna Qorǵanys mınıstrliginiń basshylyǵy, Qaraǵandy oblysynyń ákimi Ermaǵanbet Bólekpaev, Bilim mınıstriniń orynbasary Aıbat Іlııasov, Qazaqstandaǵy Ázerbaıjannyń áskerı atashesi polkovnık Zaýr Kerimov, Ázerbaıjan Qorǵanys mınıstrliginiń ókili polkovnık Nazım Vahıdoglý Abbasov, Ózbekstannyń «Vatan taııanchı» áskerı-patrıottyq qozǵalysynyń bastyǵy polkovnık Bahrom Zýlfıkorov, Qaraǵandy oblysynyń «Namys» ázerbaıjan mádenı ortalyǵynyń tóraǵasy Gıýlaga Rzaev, Qazaqstan Qarýly kúshteriniń ardagerleri qatysty.

Jıynǵa qatysýshylardy jarystyń sátti aıaqtalýymen Qazaqstan Qorǵanys mınıstri general-polkovnık Rýslan Jaqsylyqov quttyqtady. Ol baýyrlas Ázerbaıjan, Ózbekstan elderimen aradaǵy kelisim, teńdik, ózara qurmet pen senim qaǵıdattaryna negizdelgen tatý kórshilik qatynastardyń mańyzdylyǵyn atap ótti.

– IX halyqaralyq áskerı-patrıottyq jastar jıyny beıbitshilikti súıetin halyqtarymyzdyń ózara tıimdi yntymaqtastyqty damytýǵa jáne dostyq baılanystardy nyǵaıtýǵa degen umtylysyn aıqyn kórsetti, – dep atap ótti Qazaqstan qorǵanys vedomstvosynyń basshysy.

Áskerı-qoldanbaly sport túrlerine, zııatkerlik jáne shyǵarmashylyq konkýrstarǵa 700-den astam uldar men qyzdardan quralǵan 43 komanda qatysty.

Jıyn qorytyndysy boıynsha halyqaralyq esepte úshinshi oryndy Ázerbaıjan, ekinshi oryndy Ózbekstan, birinshi oryndy Qazaqstan komandalary ıelendi.

Astana qalasyndaǵy Qorǵanys mınıstrliginiń Saǵadat Nurmaǵambetov atyndaǵy áskerı kolledjiniń komandasy «Aıbyn» IX halyqaralyq áskerı-patrıottyq jastar jıynynyń Gran-prı ıegeri jáne absolıýtti chempıony atandy. Olar sondaı-aq respýblıkalyq áskerı oqý oryndary sanatynda da úzdik dep tanyldy.

Óńirlik qatysýshylar arasynda Qyzylorda oblysynyń «Syr aıbyny» áskerı-patrıottyq klýbynyń komandasy jeńiske jetti.

Qarýly kúshterdiń, basqa da áskerler men áskerı quralymdarynyń áskerı-patrıottyq klýbtary arasynda Tótenshe jaǵdaılar mınıstrliginiń «Jas ulan» komandasy úzdik atandy.

Shyǵys» óńirlik qolbasshylyǵy «Jas barlaýshy» áskerı-patrıottyq klýbynyń tárbıelenýshisi Meıirjan Temirjanov «Úzdik jas sarbaz» nomınatsııasy kýbogyn ıelendi.

Jarys jeńimpazdary kýboktarmen, medaldarmen, dıplomdarmen jáne estelik syılyqtarmen marapattaldy. Saltanatty jıyn sońynda «Aıbyn-2023» týy Saǵadat Nurmaǵambetov atyndaǵy áskerı kolledj komandasynyń kapıtanyna tabystaldy.