«Aıbyn-2020» áskerı-patrıottyq jıyny aıaqtaldy
Baspasóz qyzmetiniń málimetterine qaraǵanda, bul rásim beınebaılanys arqyly Qazaqstannyń barlyq óńirinde onlaın túrde kórsetilip, sonyń arqasynda jıynǵa qatysýshylar tikeleı efırden baqylaýǵa múmkindik aldy.
Atalǵan is-sharaǵa qorǵanys mınıstri general-leıtenant Nurlan Ermekbaev, Aqparat jáne qoǵamdyq damý mınıstri Aıda Balaeva, Bilim jáne ǵylym vıtse-mınıstri Sholpan Karınova, jeke synaqta jáne «Úzdik Jas sarbaz» atalymy boıynsha úzdik komanda kapıtandary, jıynnyń jeńimpazdary qatysty.
Respýblıkalyq jıyn eki aı boıy ótti. Onlaın-formatta 39 komanda jarysty. Jalpy qatysýshylar sany 585 adamdy qurady. Jıynnyń konkýrstaryna áskerı qoldanbaly sport túrleri, ıntellektýaldyq jáne shyǵarmashylyq jarystar kirdi.
«Men jeńimpazdardy quttyqtaımyn. Barlyq qatysýshylarǵa jeńiske degen umtylysy úshin alǵys bildiremin. Sizder bárińiz áskerı ispen tanysyp, armııa men Qarýly Kúshterdiń tarıhy týraly bildińizder, jetistikterińizdi, bilimderińiz ben eptilikterińizdi kórsettińizder, jańa dostar taptyńyzdar, ózderińizdi synap kórdińizder», – dedi Nurlan Ermekbaev.
Shyǵys Qazaqstan oblysynyń, Tyl jáne qarý-jaraq bastyǵy basqarmasynyń, sondaı-aq Nur-Sultan qalasyndaǵy «Jas ulan» respýblıkalyq mektebiniń komandalary óz atalymdarynda úzdik atandy. Tyl jáne qarý-jaraq bastyǵy basqarmasynyń «Saǵadat» komandasy jıynnyń absolıýtti Gran-prı jeńimpazy atandy.
Jeńimpaz komandalar kýboktarmen, medaldarmen, dıplomdarmen jáne qundy syılyqtarmen marapattaldy. Ár konkýrsant qatysqany týraly sertıfıkat aldy.
«Jyl saıynǵy jıyn – bul biz úshin jańa tájirıbe, jańa dostar, jańa áserler. Qashyqtyqtaǵy formatta ótýine qaramastan, konkýrs óte qyzyqty, ári tartymdy boldy. Bul jıyn bizdiń júregimizde Otanǵa degen súıispenshiliktiń otyn jaqty. Bizdi jyl saıyn óte joǵary deńgeıde ótetin osyndaı aýqymdy sharalarǵa qatysýǵa múmkindiktiń bolýy qýantady», - dep Shyǵys Qazaqstan oblysy «Jas qyran» komandasynyń kapıtany Ajar Yqylasova óz áserimen bólisti.