«Aıboz» ulttyq ádebı syılyǵynyń jeńimpazyna 5 mln teńge beriledi
«Bıyl 15 maýsymda Mádenıet jáne sport mınıstri Dáýren Abaev zııaly qaýym ókilderimen, aqyn-jazýshylar, jýrnalıstermen kezdesip, elimizde tuńǵysh ret osy «Aıboz» ulttyq ádebı syılyǵy taǵaıyndalatynyn jarııalaǵan edi. Sodan beri eki aı ótti, endi bizde bir aı merzim qaldy. Ulttyq ádebı syılyqta «Úzdik proza», «Úzdik poezııa», «Úzdik drama», «Úzdik aýdarma», «Úzdik balalar ádebıeti», «Úzdik komıks» jáne «Úzdik kitap» nomınatsııalary bar. Ár atalymnyń jeńimpazyna 5 mln teńgeden júlde taǵaıyndalǵan. Sonymen birge «Úzdik komıks» jáne «Úzdik kitap» nomınatsııalary alǵash ret ótkizilip otyr», - dedi QR Mádenıet jáne sport mınıstrligi Arhıv jáne qujattamany basqarý komıtetiniń tóraǵasy Qýat Borash Ortalyq kommýnıkatsııalar qyzmetinde.
Baıqaýǵa ótinimder aiboz@kitap-palatasy.kz elektrondy mekenjaıyna 2022 jylǵy 15 maýsymnan 1 qazanǵa deıin qabyldanady.
«Mundaǵy basty talap – jańa dúnıeler ǵana qabyldanady, shyǵarma buryn-sońdy esh jerde, áleýmettik jeliler men gazet-jýrnaldarda jarııalanbaǵan bolýy tıis. Eki aıda baıqaýǵa 150-den astam eńbek kelip tústi. Kóptegen eńbekterdiń qujattary durys bolmaǵandyqtan, olardy qaıtaryp, túzetip qaıta jiberýge múmkindik berip jatyrmyz. Suranys óte kóp, bir avtordan 4-5 eńbek keletin sátter de bar. Qyzyǵýshylyq tanytqandar kún saıyn arnaıy telefonymyzǵa habarlasyp jatyr. Negizgi eńbekterdiń bári qyrkúıek aıynda keledi dep oılaımyz», - dedi Ulttyq memlekettik kitap palatasynyń dırektory Ádil Qoıtanov.
Sonymen birge, spıkerdiń aıtýynsha, baıqaýǵa qatysýshylardyń jasyna esh talap qoıylmaıdy. Ár nomınatsııada bir ǵana jeńimpazǵa 5 mln teńge tabystalady.
«Mysaly jaqynda 13 jasar bala habarlasyp, óz shyǵarmalaryn jiberdi. Árıne, biz oǵan ruqsat ettik. Bizdiń baıqaýǵa 13 jasar baladan Memlekettik syılyq laýreaty bolǵan kisiler de qatysyp jatyr. Negizinen proza, poezııa, balalar ádebıeti janrlaryna ótinim kóptep túsýde, kitap dızaıny boıynsha da qatysýshylar kóp, komıkster ázirge az», - dedi Ádil Qoıtanov.
Aıta keteıik, ádebı syılyq jeńimpazdarǵa jyl sońynda tapsyrylady. Konkýrs nátıjesinen soń jeńimpazdardyń eńbekteri 500 danamen jaryq kóredi.
Baıqaýdyń tolyq erejesi men tujyrymdamasy http://kitap-palatasy.kz/ saıtynda jazylǵan.