Aıbek Smadııarov Taılandta sýǵa batqan qazaqstandyq týraly qosymsha málimet berdi
«1 qyrkúıekte Qazaqstannyń Taılandtaǵy elshiligine Phýket aralynda Qazaqstan azamaty sýǵa túsip, batyp ketti degen aqparat kelip tústi. Sol aqparatty tekserý úshin bizdiń konsýl jergilikti bıliktermen, polıtsııamen baılanysty. Eki kún izdestirý jumystary júrgizildi. Úshinshi qyrkúıek kúni bir azamattyń denesi sýdan shyǵaryldy. Biraq sýda eki kún jatyp qalǵandyqtan deneni taný nemese basqa da ajyratý múmkindigi óte qıyn. Sondyqtan áke-sheshesi búgin polıtsııaǵa baryp, taný protsedýrasyna qatysyp, balasy ekenin tanydy», - dedi SІM ókili.
Onyń aıtýynsha, marqum 15 jasynan beri shetelde saıahattaýmen áýestenip kelgen.
«Bul azamat Taıland aýmaǵynda júrgenine birneshe aı bolǵan. 18 jastaǵy bala, You Tube-te óte belsendi bolǵan. 15 jasynan shetelde qydyryp júredi eken. Ókinishke qaraı osyndaı jaǵdaı boldy. Áke-sheshesine barlyq kómek kórsetiledi.
Anasy da, ákesi de sol jerde. Jaqyn arada bozbalanyń denesi Qazaqstanǵa jetkiziledi», - dedi Aıbek Smadııarov.