Aıbat Seıten Argentına chempıonyn tize búktirdi

ASTANA. QazAqparat - «Álem barysynda» Qazaqstannyń namysyn qorǵaýǵa shyqqan bes balýannyń biri Aıbat Seıten argentınalyq Lýchıano Del Rıomen boz kilemge shyqty, dep habarlaıdy «QazAqparat» HAA tilshisi.

Aıbat Seıten kezdesýdiń alǵashqy jartysynda jartylaı jeńiske jetken bolatyn. Biraq qarsylasy da osal emes edi. Lýchıano Del Rıonyń grek-rım kúresinen Ońtústik Amerıkanyń chempıony, Pan-Amerıka chempıonatynyń qola júldegeri, Argentına chempıony sekildi ataqtary bar. Alaıda qazaq kúresinen saqa Aıbat argentınalyqqa ese jibergen joq. Beldesýdiń aıaqtalýyna jaqyndaǵan ýaqytta Lýchıanony alyp uryp, jeńis tuǵyrynan kórindi.

Eske sala ketsek, buǵan deıin boz kilemge shyqqan qazaqstandyq úsh balýan Aıbek Nuǵymarov, Elaman Erǵalıev pen Erjan Shynkeev qarsylastaryn utyp, kelesi kezeńge ótken bolatyn. Al ózbek balýanynan utylyp qalǵan Dáýren Nuralınov jarystan shyǵyp qaldy.