Aıazda kóligimen halyqty tegin tasyǵan jýrnalıst alǵysqa bólendi
Osy kúnderi Qostanaı oblysynda aýa temperatýrasy kúndiz -35, -38 gradýsqa deıin tómendep ketti. Saldarynan kóshede kólikter otalmaı, avtobýstar júrmeı qaldy. Dalada búrseń qaqqan turǵyndar úılerine jete almaı álek. Biraq, keıbir kólik júrgizýshiler kóshede tońyp turǵan qarııalar men qyz-kelinshekterdi úılerine tegin jetkizýde. Solardyń biri – Jumataı Kákimjanov týraly turǵyndar áleýmettik jelilerde jarysa jazyp, alǵystaryn bildirýde.
«Búgin tańǵy 8-der shamasynda avtobýs kútip turǵanmyn. Qoǵamdyq kólikter 15-20 mınýt keshigip júredi ǵoı. Bir kezde aıaldamaǵa «KIA» avtokóligi toqtap, ortalyqqa deıin tegin aparyp tastaıtynyn aıtty. Usynysyn qabyldap, kólikke mindik. Menimen birge taǵy 3 kelinshek otyrdy. Jolda Jumataıdyń jergilikti gazette jumys isteıtinin bildik. Bizdi qajet jerge deıin jetkizip tastady. Osyndaı uldy tárbıelegen ata-anasyna myń alǵys», - deıdi qala turǵyny Baýyrjan Abýlov.
Jumataı Kákimjanov oblystyq «Qostanaı tańy» gazeti dırektorynyń orynbasary qyzmetin atqarady. Ol kólik júrgizýshilerin aıazdy kúni kóshede turǵan adamdardy tońdyrmaı, qajetti jerine jetkizip tastaýǵa shaqyrdy.
«Negizi bul asa qatty jarnamalaıtyn is emes edi. Kez kelgen kólik mingen adam kóshede tońyp turǵan jolaýshylardy kórse, jaıbaraqat ótip kete almaıdy. Búgin de osyndaı jaǵdaı boldy. Aıaldamaǵa toqtap, birneshe adamdy ortalyqqa deıin jetkizip salaıyn degen tilek bildirdim. Kólikke mingen kelinshekterdiń biri kelesi aıaldamada qyzynyń tońyp turǵanyn aıtty. Sosyn jolaı ony da toqtap ala ketken edik. Osylaısha, úsh jolaýshymdy aıtqan jerine deıin apardym. Alaıda, jumysymnan sál keshigip qaldym. Jalpy sýyqqa shydamaǵandar jol boıyna shyǵyp, qol bulǵaýǵa májbúr. Sol kezde kólik júrgizýshileri olardy tońdyrmaı, ala ketse degen tilek bar», - deıdi Jumataı Kákimjanov agenttik tilshisine.