Aıaýjan Áshimova: Prezıdent halyqty tolǵandyrǵan máselelerden habardar ekenin kórsetti

ÓSKEMEN. QazAqparat – «Ulaǵat» jastar qoǵamdyq birlestiginiń tóraıymy Aıaýjan Áshimova QR Prezıdenti Qasym-Jomart Toqaevtyń Parlament Májilisiniń otyrysynda jasaǵan málimdemesine qatysty óz oıymen bólisti, dep habarlaıdy QazAqparat tilshisi.

«Memleket basshysy eń negizgi degen barlyq salaǵa toqtalyp, el turǵyndaryn tolǵandyrǵan máselelerdi túgel aıtty. Onyń ishinde ýtıldik alym, baılar men kedeıler arasynda úlken alshaqtyq baryn alǵash ret málimdep, muǵalimder men jastarǵa qatysty sóz qozǵady. Ózim jastar qoǵamdyq uıymynyń jetekshisi bolǵandyqtan maǵan Prezıdenttiń bilim sapasyn arttyrýǵa qatysty qoıǵan mindetteri erekshe áser etti», - deıdi Aıaýjan Áshimova.

Onyń aıtýynsha, qazir memleket pen qazaqstandyqtardyń aldynda jastar saıasatyn jolǵa qoıyp, osy ýaqytqa deıin jiberilgen olqylyqtardy túzep qana qoımaı, keleshekte munyń aldyn alý úshin qoldan kelgenniń bárin jasaý mindeti tur.

«Jastarymyz bilimdi bolsa, óz jolyn taýyp, elge paıdasyn tıgizedi. Tarıhty bilse, ótkenniń qateligin jasamaıdy. Biraq eń bastysy, óskeleń urpaqtyń boıyna rýhanı qundylyqtardy sińirsek, naǵyz patrıottardyń qalyptasatyndyǵy anyq. Qoryta aıtqanda, Qasym-Jomart Kemeluly óz málimdemesinde halyqty tolǵandyrǵan máselelerden habardar ekendigin kórsetti», – deıdi «Ulaǵat» jastar qoǵamdyq birlestiginiń tóraıymy.