Aıaýlym Ámirenovanyń ákesi: Olımpıadaǵa attanǵan qyzyma aq jol tileımin

ÓSKEMEN. QazAqparat – Beıjińde ótetin qysqy Olımpıadaǵa Shyǵys Qazaqstan oblysynan 9 sportshy jol tartty. Onyń ishinde frıstaılshy Aıaýlym Ámirenova bar. Olımpıadada ekinshi ret el namysyn qorǵaıtyn 20 jastaǵy Aıaýlym úshin otbasynyń, jaqyndarynyń qoldaýy erekshe ystyq. Olar taqymdaryn qysyp, úkilegen úmitterin artyp otyr. Qazaqparat tilshisimen áńgimelesken sportshynyń ákesi Serik Ámirenov baýyr eti balasynyń juldyzy janyp, jetistikke jetýine láıim tilekshi ekendigin jetkizdi.

Úsh jasynan shańǵy tebedi

4-20 aqpan aralyǵynda Qytaıdyń Beıjiń qalasynda ótetin XXIV qysqy Olımpıada oıyndarynda frıstaıl-mogýldan baq synaıtyn 6 sportyshynyń biri – Aıaýlym Ámirenova. Ol 2001 jyly 30 qarashada Shyǵys Qazaqstan oblysy Zaısan aýdanynda dúnıege kelgen. Óskemendegi Sporttaǵy daryndy balalarǵa arnalǵan mektep-ınternatynyń túlegi.

Frıstaıldan Halyqaralyq dárejedegi sport sheberi atanǵan ol Eýropa kýboginiń 2017 jylǵy kezeńiniń altyn, qola, kúmis júldegeri. 2018 jyly Phenchhanda ótken Olımpıada oıyndaryna qatysqan.

«Qyzym 3 jasynda shańǵy tebýdi úırendi. Mine, sodan bastap sportpen úzdiksiz shuǵyldanyp kele jatyr. Eń áýeli Óskemenniń irgesindegi Altaı alpisine aparyp, sportqa baýlydyq. 4 jasynan jattyqtyrýshy Sergeı Aksenovtiń tálimin kórip, frıstaıl-mogýlǵa qyzyǵýshylyǵy artty», - deıdi ákesi Serik Ámirenov.

Boıynda tabandylyq bar

Erli-zaıyptylar 2 bala tárbıelep, ósirdi. Tuńǵyshtary – ul, Aıaýlym – kenjeleri. Qanattyǵa qaqtyrmaı, tumsyqtyǵa shoqtyrmaı mápelegen qyzdarynyń minezi ashyq, sabyrly.

«Sportshynyń sporttan basqa dúnıelermen aınalysýǵa kóp ýaqyty bola bermeıdi. Qyzymyz osy joldy tańdap, bar yntasyn, kúsh-jigerin soǵan sarp etip júr. Alaıda sabaqtan da esh qol úzbedi. Mektepti kileń bestikke aıaqtap, «Altyn belgi» ıegeri atandy. Sportta sabyrsyz, tózimsiz adamnyń jetistikke jetýi ekitalaı. Al balamyzdyń boıynda tabandylyq, shydamdylyq bar. Olımpıadaǵa attanǵan qyzyma aq jol tileımin! Týǵan-týystary, jerlesteri, muqym Qazaqstan qoldaýlaryn bildirýde. Barshańyzǵa rızamyz!», - dedi Serik Ámirenov.

Zaısan aýdanynyń ákimi Serik Zaınýldın Aıaýlymǵa sáttilik tilep, jeńispen oralýyna tileýlestigin jetkizdi.

«Frıstaıl - qazaqtyń ul-qyzdary úshin ıgerilmegen asa kúrdeli sport túri. Soǵan qaramastan Aıaýlym óziniń tabandylyǵy men kásibı sheberliginiń arqasynda bıik belesterdi baǵyndyrýda. Aıaýlym Serikqyzyna Olımpıada oıyndarynda sáttilik tileımin! Aspan asty elinde el namysyn qorǵap, jeńis bıiginen kórinýine tilekshimin. Elimizdiń ǵana emes, oblysymyzdyń, aýdanymyzdyń namysyn qorǵaıtynyńa zor senim bildiremin!», - dedi ol.

95 eldiń kil myqtylary saıysqa túsetin qysqy Olımpıada sporttyń 7 túrinen ótedi. Jalpy sany 109 medal oınatylmaq. Qazaqstandyq sportshylar frıstaıl, tramplınnen shańǵymen sekirý, bıatlon jáne taý shańǵysy sııaqty sport túrleri boıynsha óner kórsetedi.

Olardyń ishinde 9 shyǵysqazaqstandyq bar. Atap aıtqanda, ıÝlııa Galysheva, Aıaýlym Ámrenova, Anastasııa Gorodko, Dmıtrıı Reıherd, Pavel Kolmakov, Olesıa Graýr, Sergeı Tkachenko, Galına Vıshnevskaıa-Sheporenko jáne Zahar Kýchın. Árqaısysy iri halyqaralyq jarystarda jeńimpaz atanyp keledi. Respýblıkadaǵy barlyq óńirler arasynan eń kóp sportshy osy oblystan shyqty.