Aıan Sakoshev ákimderdiń halyqpen kezdesýlerin ótkizýge qatysty pikir bildirdi

NUR-SULTAN. QazAqparat – «Jastar» ǵylymı-zertteý ortalyǵynyń dırektory Aıan Sakoshev Prezıdenttiń ákimderdiń halyqpen kezdesýlerin ótkizýine qatysty Jarlyǵyna oraı pikir bildirdi, dep habarlaıdy QazAqparat tilshisi.

«Ákimderdiń halyqpen kezdesýine qatysty Jarlyqqa oraı bir-eki aýyz sóz aıtqym keledi. Qujatqa sáıkes, «halyq únine qulaq asatyn memleket» tujyrymdamasyn odan ary jańǵyrtý, elimizde júzege asyrylyp jatqan reformalar jaıynda halyqty qulaqtandyrý, jergilikti atqarýshy organdar esebiniń ashyqtyǵyn qamtamasyz etý maqsatynda Prezıdent halyqpen kezdesýdi jyl boıy ótkizýdi júktedi. Onyń barysynda halyqty tolǵandyratyn áleýmettik máselelerge basymdyq bere otyryp, Qazaqstan jańǵyrýynyń jańa baǵdarynyń negizgi baǵyttaryn, problemaly máselelerdi sheshý joldary men merzimin túsindirý qajet», - dep jazdy ol Facebook paraqshasynda.

Onyń atap ótýinshe, osy ýaqytqa deıingi ákimderdiń jyl saıynǵy halyqqa esep berý kezdesýlerin ózgertý máselesi biraz ýaqyttan beri pisip-jetildi.

«Sońǵy oqıǵalar bul baǵyttaǵy barynsha júıeli is-sharalardyń qajet ekendigin kórsetip berdi. Bul rette Batys Qazaqstan oblysynda júzege asyrylǵan «ashyq ákimdik» tájirıbesin sátti úlgilerdiń biri retinde usynýǵa bolady. Oblys, qala ákiminen bastap, prokýratýra, densaýlyq saqtaý, bilim berý, kommýnaldyq sharýashylyq salalary basshylary turaqty túrde azamattardy qabyldap otyrdy», - dedi Aıan Sakoshev.