Aıaqpen jazylǵan sálemhat: Qytaılyq qandasymyzdyń haty kózge jas úıirdi

NUR-SULTAN. QazAqparat – Qoǵam qaıratkeri, fılologııa ǵylymynyń doktory, professor Myrzataı Joldasbekov Qytaıda turatyn qyrǵyz jáne qazaqtarmen hat alysyp turatynyn aıtty, dep habarlaıdy QazAqparat tilshisi.

«Men Qytaıda turatyn qazaqtar jáne qyrǵyzdarmen hat jazysyp, baılanysyp turamyn. Sol jerde Júsip degen aǵamyz boldy. Byltyr 97 jasynda qaıtys boldy. Elge ákelgim kelip júrgen, ókinishke qaraı dúnıeden ozyp ketti. Ol kisi Qytaıda «bas madaqshy» dep atalyp jáne ol qyzmeti úshin jalaqy alatyn. Qazirgi kúni ol kisiniń Jánibek degen jas shákirti bar. Onyń eki qoly joq, maǵan hat jazǵanda «aıaqpen jazylǵan sálemhat» dep bastap jazady. Kózińe eriksiz jas alasyń. Jazǵanda da móldiretip turyp, marjandaı qylyp jazady», -dedi qoǵam qaıratkeri Myrzataı Joldasbekov Ulttyq mýzeıde ótken «Geografııa – mádenı damý baǵyty» atty kórmeniń ashylýynda sóılegen sózinde.

Aıta ketsek, búgin Ulttyq mýzeıde «Geografııa – mádenı damý baǵyty» atty kórme ashyldy.
Oǵan qostanaılyq aǵaıyndy Ańqaýovtardyń júnnen jasalǵan kartınalary qoıylǵan. Kórmeni elordalyqtar 30 qyrkúıekke deıin tamashalaı alady.