Aıaǵy jansyzdanǵan azamatqa elorda dárigerleri erekshe ota jasady

ASTANA. QazAqparat - Júk kóliginen qulap, aıaǵy jansyzdanyp qalǵan qostanaılyq turǵynǵa elordadaǵy akademık N.Batpenov atyndaǵy Ulttyq ǵylymı travmatologııa jáne ortopedııa ortalyǵynyń dárigerleri erekshe ota jasady, dep habarlaıdy QazAqparat.

Áleýmettik medıtsınalyq saqtandyrý qorynyń málimetinshe, patsıentke MÁMS júıesi aıasynda em júrgizilýde.

Qostanaı oblysy Rýdnyı qalasynyń turǵyny 2022 jyldyń maýsym aıynda jumys ýaqytynda júk kóliginen sekirip, alǵan jaraqatynyń saldarynan aıaǵy jansyzdanyp qalǵan. Sol mezette jedel járdem shaqyrylyp, ol jergilikti kópsalaly aýrýhanaǵa jetkizilgen.

5 aı ýaqyt aralyǵynda aýrýhanada bolǵan naýqastyń aıaǵyn saqtap qalý úshin oǵan Ilızarov apparaty qoıyldy. Sonymen qatar birneshe aýyr ota jasaldy. Patsıentti ári qaraı emdeý maqsatymen Rýdnyı qalasynyń kópsalaly aýrýhana dárigerleri telemedıtsına arqyly akademık N.J.Batpenov atyndaǵy Ulttyq ǵylymı travmatologııa jáne ortopedııa ortalyǵynyń mamandarymen baılanysty. Patsıent jaıly tolyq aqparat naqtylanǵan soń, naýqasty Astana qalasyna jetkizý usynyldy.

«Qazan aıynyń sońynda patsıentti bizdiń ortalyqqa jetkizgennen keıin, bólimshe dárigerleri ony tolyq qarap, jaǵdaıyn oılasty. Konsılıým barysynda aldymen teri transplantatsııasyn jasaımyz, sodan soń naýqasqa osyǵan deıin ornatqan Ilızarov apparatyn sheship, oń aıaǵyna basqa jolmen bekitý týraly sheshim qabyldandy», - deıdi akademık ortalyqtyń №4 travmatologııa bólimshesiniń dárigeri Álııa Atapıleva.