Aıagózdikter «Qazaqstan barysy» atanǵan Dáýren Nuralınovqa shapan jaýyp, at mingizdi

AıAGÓZ. QazAqparat - «Qazaqstan barysy» Dáýren Nuralınov týyp-ósken jeri Aıagózge keldi. Jerlesteri balýandy zor qoshemetpen qarsy aldy, dep habarlaıdy QazAqparat tilshisi.

Aıagóz óńiriniń maqtanyshy, «Qazaqstan barysy» atanǵan jas balýan Dáýren Nuralınovty halyq ortalyq alańda kútip aldy.

Aqyndar arnaý aıtyp, aýdan basshysy Seıilbek Ysqaqov balýannyń ıyǵyna shapan jaýyp, at mingizdi.

«Aıagóz - ejelden batyrlar eli. Babalardyń batyldyq pen qaısarlyq rýhyn jalǵaǵan Dáýren Nuralınov tek osy el men jerdiń ǵana emes, kúlli Qazaqstannyń maqtanyshy», - dep atap ótken ákim sportshyǵa aq batasyn berip, qoshemet kórsetti.

«Aıagóz degen - altyn besigim, týǵan jerim. Atalarymyzdyń arýaqtaryna quran baǵyshtap, sizderdiń batalaryńyzdy alaıyn dep arnaıy keldim. Peıilderińizge kóp rahmet!. Aıagózimiz árqashan jaınaı bersin, batyrlar shyǵa bersin», - dep rızashylyǵyn bildirdi Dáýren Nuralınov.

Eske sala keteıik, Dáýren Nuralınov 4 shilde kúni astanada ótken «Qazaqstan barysy» týrnırinde bas júldeni jeńip alǵan bolatyn.